Bu gün saat 18:20 radələrində İsmayıllı rayonunun Qaraqaya kəndi ərazisində Şahid İsgəndərov idarə etdiyi “İsuzu” markalı avtobusla yolu keçən piyada, 2010-cu il təvəllüdlü Qobustan rayon sakini A.Cəfərovu vurub.

Müxtəlif dərəcəli bədən xəsarətləri alan yeniyetmə hadisə yerində ölüb.

Bu barədə YAZTV-ə Daxili İşlər Nazirliyinin mətbuat xidmətinin Şəki regional qrupundan bildirilib.

Neftçala rayonunda Ulu Öndər Heydər Əliyevin anadan olmasının 100 illik yubileyi ilə əlaqədar tədbirlər proqramına uyğun olaraq Neftçala rayon İcra Hakimiyyətinin və YAP Neftçala rayon təşkilatının birgə təşkilatçılığı ilə “Heydər Əliyev və Azərbaycançılıq məfkurəsi” mövzusunda elmi praktiki konfrans keçirilib.

Elmi praktiki konfransda Neftçala Rayon İcra Hakimiyyətinin başçısı Mirhəsən Seyidov, Azərbaycan Respublikasının 1-ci baş naziri, siyasətçi Həsən Həsənov, Yeni Azərbaycan Partiyasının veteranlar şurasının sədri Arif Rəhimzadə, Yeni Azərbaycan Partiyası veteranlar şurasının üzvü, yazıçı Tahir Məmmədov, kinorejissor, ssenarist, Azərbaycan Respublikasının xalq artisti Vaqif Mustafayev, RİH-in məsul şəxsləri, YAP Neftçala rayon təşkilatının, hüquq- mühafizə orqanlarının, idarə, müəssisə və təşkilatların rəhbərləri, şəhid ailələri, Vətən müharibəsi iştirakçıları və rayon ictimaiyyəti iştirak edib.

İlk öncə konfrans iştirakçıları Neftçala şəhərinin mərkəzindəki Ümummilli Lider Heydər Əliyevin əzəmətli heykəlini ziyarət edib, önünə gül dəstələri düzüb, ruhunu ehtiramla yad ediblər və Ulu Öndərin Heydər Əliyevin həyatını əks etdirən rəsm sərgisinə baxış keçiriblər.

Konfransda çıxış edən Neftçala rayon İcra Hakimiyyətinin başçısı Mirhəsən Seyidov Ümummilli Lider Heydər Əliyevin Azərbaycan xalqının və dövlətçilik fəaliyyətində müstəsna xidmətləri olan bir şəxsiyyət olduğunu, sovetlər birliyinin dağılmasından və Azərbaycanın müstəqillik əldə etməsindən sonra dilindən, dinindən və milli-mənəvi dəyərlərindən asılı olmayaraq bütövlükdə dövlətçilik ənənələrinin formalaşdırılmasında mühüm işlər görən Ulu Öndər Heydər Əliyevin 1990-cı illərin əvvəllərindən başlayaraq ölkəmizdə yeni istifadə edilərək inkişaf etdirilən azərbaycançılıq ideologiyasının mühüm elementlərinin inkişaf etdirilməsində əvəzsiz işlər görməklə tarixə düşməsini, azərbaycançılıq ideologiyası xüsusən də yeni müstəqillik əldə edən respublikanın hüquqi və demokratik dövlət kimi möhkəmləndirilməsi, inkişaf etdirilməsi üçün Ulu Öndər tərəfindən irəli sürülən əvəzedilməz bir ideologiyaya çevrilməsini iştirakçıların diqqətinə çatdırıb. RİH-in başçısı bildirdi ki, Ulu Öndər Heydər Əliyevin dediyi kimi: Hər bir azərbaycanlı öz milli mənsubiyyətinə görə qürur hissi keçirməlidir və azərbaycançılığı - Azərbaycan dilini, mədəniyyətini, milli-mənəvi dəyərlərini, adət-ənənələrini yaşatmalıdır!

Elmi praktiki konfrans qonaqların iştirakı ilə onların Ulu Öndər Heydər Əliyev haqqında xatirələri və sual-cavab formatında davam edib.

Azərbaycan Respublikasının Birinci vitse-prezidenti Mehriban Əliyeva rəsmi instaqram səhifəsində 28 May – Müstəqillik Günü ilə bağlı paylaşım edib.

YAZTV paylaşımı təqdim edir: “Əziz həmvətənlər! Müstəqillik Günü münasibətilə sizi təbrik edir, hər birinizə cansağlığı və xoşbəxtlik, ölkəmizə sülh, əmin-amanlıq və tərəqqi arzulayıram! Qoy Azərbaycanın dövlət müstəqilliyi əbədi və sarsılmaz olsun! Uca Tanrı Vətənimizi qorusun!”.

Aparılan tədqiqatlara görə dünya əhalisinin 1 faizi, yəni 70 milyon nəfər autizm sindromundan əziyyət çəkir. Qeyri-rəsmi statistikaya əsasən, ölkəmizdə təxminən 5 minə yaxın uşaq və yeniyetmə autizm sindromludur və onların sayı artmaqda davam edir. Hər xəstəlikdə olduğu kimi autizmdə də erkən müdaxilə vacibdir. Bu səbəbdən valideynlər sindromla bağlı maariflənməli və xəstəliyin ilkin əlamətlərini bilməlidirlər. Xəstəliyin əlamətləri bəzən erkən yaşlarda müşahidə olunur və daha çox oğlan uşaqlarında rast gəlinir.

Aprelin 2-də qeyd olunan Ümumdünya Autizm haqqında Məlumatlandırma Günü ilə əlaqədar AZƏRTAC “Yaşam” Psixoloji və Bərpa Mərkəzindən reportaj hazırlayıb. Yaşam” Psixoloji və Bərpa Mərkəzi 1,5 yaşından etibarən autizm sindromu müşahidə edilən uşaqları qəbul edir. Mərkəzin əsas fəaliyyəti - uşaqların sosial həyata uyğunlaşması, nitq qüsurları və davranış pozuntularının aradan qaldırılmasıdır. Burada autizm sindromlu uşaqların qayğısı ilə müvafiq təlim keçən mütəxəssislər məşğul olurlar.

Mərkəzin psixoloqu Kamilə Həsənova valideynlərin uşaqlarında sosial qarşılıqlı əlaqədə problem, təkrarlanan hərəkətlər, məhdud maraq, nitqdə gecikmə kimi əlamətlər müşahidə etdikləri zaman dərhal mütəxəssisə müraciət etməli olduqlarını deyib: “Hər bir autizmli uşaqda xəstəliklə bağlı müxtəlif əlamətlər olur. Biz bir simptomu bütün autizmli şəxslərə şamil edə bilmərik. Əlamətlər hamısı tez-tez, eyni anda yaranmır və simptomlar zamanla dəyişə bilir. Autizmli uşaqlarda fərqli xüsusiyyətlərin görülməsinin səbəblərindən biri də xəstəliyin şiddətdən yüngülə qədər bir çox formasının olmasıdır. Xəstəliyin bəzi formalarının gənc yaşda aşkarlanması çətindir. Şiddətli autistik simptomları olan uşaqlarda zehni geriləmə erkən nəzərə çarpır, epilepsiya, aqressiya və yuxusuzluq kimi əlavə problemlərə daha çox rast gəlinir. Ağır formada isə autizmi müşayiət edən digər xəstəliklər də olur. Mülayim autizmli uşaqlar düzgün müalicə, xüsusi təhsil ilə danışa, göz təması qura və normal təhsil ala bilərlər. Müalicədən sonra mülayim autizmli uşaqlar arasında danışan, gündəlik fəaliyyətlərini yerinə yetirə bilən, idmanla məşğul olan, hətta elmi dərəcələr əldə edənlər var. Ağır formalı autizm müşahidə edilən uşaqlarda isə əsas məqsədimiz onların müstəqil həyat tərzinə adaptasiyasına nail olmaqdır. Autizmin həmin formasından əziyyət çəkənlərdə qarşılıqlı şifahi və sözsüz münasibətlər, maraqlar və fəaliyyətlərdə çatışmazlıqlar müşahidə olunur. Əsas məsələ onların maraq dairəsinin yaradılmasını təmin etməkdir. Bu səbəbdən onları müxtəlif ekskursiyalara aparmaq, musiqi və uyğun olduqları idman növü ilə tanış etmək daha məsləhətlidir. Autizmli uşaqlarda davamlı xüsusi təhsil mütləqdir. Mərkəzdə idman, musiqi, loqoped və psixoloq dəstəyi olmaqla dörd əsas dərs növü var. Dərslərlə yanaşı, autizmli uşaqların sosiallaşması üçün həftə sonları onlar parklara aparılır, müxtəlif növ zehni oyunlara cəlb edilirlər”.

Psixoloqun sözlərinə görə, bəzi autizmli uşaqlarda qeydə alınan özlərinə zərərverən davranışlar, ətrafındakı insanlara qarşı zoraki hərəkətlər dərman müalicəsi lazım olacaq dərəcədə ciddi ola bilir. Bu səbəbdən erkən yaşlarda müşahidə edilən aqressiya və hiperaktivlik kimi hallar vaxtında müalicə edilməlidir.

Mərkəzin loqoped-defektoloqu Fatimə Kazımova kiçik yaşlardan etibarən autizmli uşaqlarda nitq pozulmasının müşahidə edildiyini deyib: “Bəzi hallarda onların nitqi ünsiyyət vasitəsi olmaq üçün inkişaf etmir. Autizmli uşaqlara öz adları ilə səsləndikdə baxmırlar və bu səbəbdən valideynlər tez-tez qulaq-burun-boğaz mütəxəssislərinə eşitmə problemi şübhəsi ilə bağlı müraciət edirlər. Uşaqların bəziləri ara-sıra güclü vurğular, yarımçıq səslər və ya vacib olmayan mövzularda fasiləsiz danışırlar. Bu kimi hallarda sözlərin tərkibindəki hər bir heca üçün ayrı dərslər keçilməsi vacibdir. Hazırda uşaqlar arasında sərbəst nağıl danışan, hətta şeir əzbərləyənlər də var. Autizmli uşaqların təxminən yarısı 5 yaşına qədər nitqlərini inkişaf etdirə bilmirlər. Müəyyən dərslərdən sonra bir çox autizmli şəxs işarə dili, yazı, şəkil lövhələri və kompüterlərlə ünsiyyət qura bilər. Yüngül autizmdən əziyyət çəkən uşaqlar 4-5 yaşlarında cümlələr qurub, öz fikirlərini ifadə edə bilirlər. Hazırda dünyada autizmin qəti diaqnozu üçün bioloji müayinə metodu hələ tapılmayıb. Həmin xəstəliyin diaqnozu autizm üçün tipik davranış nümunələri və mövcud funksional bacarıqlar müşahidə edilməklə qoyulur. Uşaqların müayinəsində ictimai münasibətlər, nitq, ünsiyyət, maraqlar və fəaliyyətlər daxil olmaqla idrak və davranış qiymətləndirməsi aparılır”.


“Yaşam” Psixoloji və Bərpa Mərkəzinin autizm üzrə türk mütəxəssis Güldeniz Metin övladı bu sindromdan əziyyət çəkən valideynlərin onları cəmiyyətdən uzaqlaşdırdığını deyib: “Autizmli uşaqlarda hiperaktivlik yaz və payız aylarında artır. Bu kimi hallarda onları cəmiyyətdən uzaq saxlamaq düzgün deyil. Autizmdə müalicə əsasən erkən diaqnoz, davranış üsulları və uşağın xüsusiyyətlərinə görə formalaşan xüsusi təhsil təcrübələrinə əsaslanır. Bundan əlavə, öyrənmə və danışma problemləri üçün terapiya tətbiq olunur. Dərman müalicəsi sosial münasibət və nitq kimi əsas simptomları dəyişdirmir, lakin hiperaktivlik, narahatlıq, depressiya, yuxu və yemək problemləri, özünə zərər verən davranışların qarşısının alınması baxımından faydalıdır.


Autizmli uşaqların idman-terapisti Türkan Tahirli 6 ildir ki, həmin problemdən əziyyət çəkən uşaqlar ilə işlədiyini bildirib. Onun sözlərinə görə, autizm və bir sıra inkişaf problemlərində, uşaq serebral iflici kimi nevropsixiatrik pozuntularda istifadə olunan idman terapiyası bu kimi uşaqlarda müşahidə olunan aşağı əzələ tonusu, tənəffüs problemləri və digər fiziki problemlərin bərpasında istifadə olunur. Fiziki terapiya növü olan idman terapiyası idmanın terapevtik istifadəsinə əsaslandığı üçün təkmilləşdirilmiş xüsusi proqramların tətbiqi ilə həyata keçirilir. Yaş qrupuna və problemlərin növünə görə fərqlənən həmin terapiya proqramları uşaqların gündəlik funksionallığını artırır. Fəaliyyət cədvəlləri ilə tətbiq olunan idman terapiyası uşaqların sərbəst şəkildə heç kimə ehtiyac duymadan idman bacarıqlarına yiyələnmələrinə səbəb olur. Eyni zamanda, autizmli uşaqlarda olan və valideynlərin ən çox əziyyət çəkdiyi hiperaktivliyin də həllidir.

Azərbaycan Dövlət Aqrar Universitetində (ADAU) Ümummilli Lider Heydər Əliyevin 100 illik yubileyinə həsr olunan “Tətbiqi elmlər və aqrar sahənin inkişafına yeni baxışlar və yanaşmalar” mövzusunda Respublika elmi-praktik konfransı keçirilib. 

Konfrans iştirakçıları əvvəlcə Ulu Öndər Heydər Əliyevin ADAU-da yerləşən büstü önünə tər çiçəklər düzüblər.

Tədbir Ulu Öndər Heydər Əliyevin və torpaqlarımızın bütövlüyü uğrunda canlarından keçən şəhidlərin əziz xatirəsinin yad olunması ilə başlayıb.

Konfransı açıq elan edən Universitetin rektor vəzifəsini icra edən Zəfər Qurbanov Ulu Öndər Heydər Əliyevin xalqın təkidli istəyi ilə 1993-cü ilin iyununda hakimiyyətə gəlişindən sonra bir çox sahələr kimi kənd təsərrüfatında da 90-cı illərin əvvəllərindən özünü kəskin büruzə verən tənəzzül meyillərinin aradan qaldırılıb, səmərəli islahatların əsasının qoyulduğunu deyib. Prezident İlham Əliyevin rəhbərliyi ilə həyata keçirilən məqsədyönlü siyasət nəticəsində ölkəmizdə iqtisadiyyatın digər sahələri kimi, aqrar sahə də sürətlə inkişaf etməkdədir.

Çıxış edən Gəncə Şəhər İcra Hakimiyyətinin başçısı Niyazi Bayramov 1969-1982-ci illərdə Heydər Əliyevin yüksək idarəçilik qabiliyyəti nəticəsində Azərbaycanda kənd təsərrüfatının bütün sahələrində əsaslı dönüş yarandığını və Ümummilli Liderin ölkəmizdə ikinci dəfə hakimiyyətə gəlişi ilə az bir zamanda iqtisadi tərəqqinin əldə edildiyini diqqətə çatdırıb.

Sonra Ulu Öndər Heydər Əliyevin ölkəmizdə kənd təsərrüfatının inkişafı ilə bağlı gördüyü işlərdən bəhs edən videoçarx konfrans iştirakçılarına nümayiş olunub.

Daha sonra Meyvəçilik və Çayçılıq ET İnstitutunun direktoru İlham Qaraqurbanlı “Seleksiya-toxumçuluq işlərinə ənənəvi və müasir yanaşmalar”, Üzümçülük və Şərabçılıq ET İnstitutunun direktoru Vüqar Səlimov “İnnovativ becərilmə texnologiyası, mühafizəsi və aqroekologiyası”, Tərəvəzçilik ET İnstitutu Publik Hüquqi Şəxs İdarə Heyətinin sədri Elmar Allahverdiyevin “Seleksiyası, fiziologiyası və toxumçuluğu” və ADAU-nun Bağçılıq kafedrasının müdiri Allahverdi Seyidovun “Bağçılıqda kadr hazırlığı” mövzularında çıxışları dinlənilib. 

Konfrans işini panel müzakirələrlə davam etdirib. 

Azərbaycan xalqı üçüncü ildir ki, Müstəqillik Gününü qalib xalq kimi qürurla qeyd edir

Bakı, 28 may, YAZTV

Müsəlman Şərqində ilk parlament respublikasının – Azərbaycan Xalq Cümhuriyyətinin yaranmasından 105 il ötür.

Qədim və zəngin dövlətçilik ənənələrinə malik Azərbaycan xalqı keçmişinin müəyyən dövrlərində tarixin hökmü ilə böyük imperiyaların tərkibinə qatılmaq məcburiyyətində qalıb. Azərbaycan Xalq Cümhuriyyəti məhz dünyanın siyasi nizamının yenidən qurulduğu bir vaxtda, XIX əsrin sonları və XX əsrin əvvəllərində Azərbaycanın mədəni yüksəliş mərhələsinin məntiqi yekunu kimi meydana çıxmışdı.

Rusiyada çarizmin süqutundan sonra bolşeviklərin hakimiyyəti ələ keçirməsi ilə keçmiş imperiya ərazisində mürəkkəb geosiyasi vəziyyət yaranmışdı. Dünyanın aparıcı dövlətlərinin Bakı neftinə marağının siyasi çarpışmaları daha da gərginləşdirdiyi belə bir şəraitdə Azərbaycanın tərəqqipərvər siyasi elitası müstəqil milli dövlətçiliyin yaradılması naminə birləşdi.

1918-ci il mayın 28-də Azərbaycanın müstəqilliyini bəyan edən İstiqlal Bəyannaməsi qəbul edildi. Yeni qurulan Azərbaycan Xalq Cümhuriyyəti öz üzərinə götürdüyü çətin tarixi vəzifəni imkanlarının ən son həddində çalışaraq şərəflə yerinə yetirdi. Azərbaycanın ilk Parlamenti və Hökuməti, dövlət aparatı təşkil edildi, ölkənin sərhədləri müəyyənləşdirildi, bayrağı, himni və gerbi yaradıldı, ana dili dövlət dili elan edildi, dövlət quruculuğu sahəsində ciddi tədbirlər həyata keçirildi. Ölkənin ərazi bütövlüyü və milli təhlükəsizliyi təmin edildi, qısa müddətdə yüksək döyüş qabiliyyətli hərbi hissələr yaradıldı, milli tələblərə və demokratik prinsiplərə uyğun dövlət orqanları quruldu, maarifin və mədəniyyətin inkişafı istiqamətində önəmli addımlar atıldı.

Ancaq birinci respublika çox yaşaya bilmədi, süqut etdi, Azərbaycan bolşevik Rusiyasının işğalına məruz qaldı, xalqımız azadlığını itirdi.

Azərbaycan dövlət müstəqilliyini təxminən 70 il sonra – 1991-ci ildə bərpa edə bildi. Lakin əsl müstəqillik həyatımız 1993-cü ildə xalqımız Ulu Öndər Heydər Əliyevi hakimiyyətə dəvət edəndən sonra başladı. İndi müstəqilliyimiz yetərincə möhkəmdir və məhz bunun nəticəsində Azərbaycan İkinci Qarabağ müharibəsində şanlı Qələbə qazandı. Otuz ilə yaxın işğal altında qalan torpaqlarımız azad edildi, ərazi bütövlüyümüz bərpa olundu. Bu, xalqımızın çoxəsrlik tarixində, eləcə də müstəqillik dövründə qazandığı ən böyük Zəfərdir.

Müasir Azərbaycan 104 il əvvəl Xalq Cümhuriyyəti qurucularının arzuladığı, xəyal etdiyi qüdrətli dövlətdir. 2003-cü ildən Prezident İlham Əliyevin rəhbərliyi ilə Azərbaycan hərtərəfli və dinamik inkişafdadır, ölkəmizin beynəlxalq imici durmadan möhkəmlənir. Vaxtilə imzalar içində imzası olmayan, çoxlarının tanımadığı Azərbaycan bu gün dünyada söz və nüfuz sahibidir. Fəxrlə qeyd edə bilərik ki, hazırda Azərbaycan dünyanın müstəqil siyasət yürüdən azsaylı ölkələrindən biridir. Bir sözlə, Ulu Öndərin və Prezident İlham Əliyevin yürütdüyü müdrik və qətiyyətli siyasət sayəsində müstəqilliyimiz əbədi, dönməz xarakter alıb.

Müstəqil Azərbaycan hər birimizin qürur mənbəyidir. Müstəqillik ən böyük dəyərimiz və sərvətimizdir. Xalqımız qanı-canı bahasına əldə etdiyi bu sərvəti əzmlə qoruyur və əbədi qoruyacaq.

Azərbaycan Respublikasının Prezidenti İlham Əliyevin müvafiq Sərəncamı ilə 2023-cü ilin “Heydər Əliyev İli” elan edilməsi ilə bağlı Gəncə şəhərində “Təmiz şəhər” aksiyası həyata keçirilir.

Gəncə Şəhər İcra Hakimiyyətinin başçısı Niyazi Bayramovun tapşırığına əsasən, aksiya çərçivəsində Gəncə şəhərinin müxtəlif ərazilərində təmizlik və abadlıq işləri görülür. Mart ayı ərzində Gəncə şəhər Mənzil Kommunal Təsərrüfatı İstehsalat Birliyinin müvafiq şöbələri tərəfindən şəhərimizin park və xiyabanlarında, küçə və prospektlərində, həmçinin Gəncəçay çayının məcrasında iməcliklər təşkil olunub, abadlıq, təmir-bərpa işləri həyata keçirilib, yaşıllıq zolaqlarına qulluq göstərilib, yeni ağaclar və gül kolları əkilib. Park və xiyabanlarda olan və təmirə ehtiyac duyan oturacaqlar bərpa edilib.

Yaşıllıq zolaqlarına xüsusi aqrotexniki qulluq göstərilərək, yerli iqlimə uyğun yeni ağaclar və dekorativ kollar əkilib, güllərdən ibarət kompozisiyalar yaradılıb.

Bununla yanaşı, MKTİB-nin Təmir-tikinti və Qəza xidməti şöbəsi tərəfindən şəhərin bir sıra küçələrində olan işıq dayaqları, körpülərin dəmir məhəccərləri və kiçik tutumlu zibil qutuları yuyularaq təmizlənib. İşlər MKTİB-in xüsusi texnikaları vasitəsi ilə həyata keçirilib.

Aparılan genişmiqyaslı təmizlik işləri Gəncəçay çayının məcrası boyu davam etdirilib. Çayın məcrası məişət tullantılarından, ağac budaqlarından, kol-kos və alaq otlarından təmizlənib.

Qeyd edək ki, Gəncə Şəhər İcra Hakimiyyətinin başçısı Niyazi Bayramov “Təmiz şəhər” aksiyası çərçivəsində görülən işləri daim diqqətdə saxlayır. Şəhər rəhbəri iməcliklərin keçirildiyi ərazilərə baş çəkərək, görülən işlərlə yerində tanış olur, öz tapşırıq və tövsiyələrini verir.

Görülən işlər Gəncə şəhər sakinləri tərəfindən də müsbət qarşılanır.

Qeyd edək ki, “Təmiz şəhər” aksiyası çərçivəsində həyata keçirilən tədbirlər bundan sonra da davam etdiriləcək.

Ötən gün axşam saatlarında Milli Məclisin deputatı Fazil Mustafa paytaxtın Sabunçu rayonunda yaşadığı evin qarşısında odlu silahdan açılmış atəş nəticəsində xəsarət alıb. Faktla bağlı hüquq - mühafizə orqanları tərəfindən cinayət işi açılıb.

Bu barədə Milli Məclisdən bildirilib.

TƏBİB-dən verilən məlumata görə, Fazil Mustafaya sağ çiynin, sağ budun yuxarı üçdə birinin güllə yarası diaqnozu ilə hazırda zəruri tibbi xidmətlərin göstərilməsi davam edir. Onun vəziyyəti stabil olaraq qiymətləndirilir və həyati təhlükəsinin olmadığı bildirilir.

Qeyd edək ki, hazırda BMT Baş Assambleyasında keçiriləcək yüksək səviyyəli iclasda iştirak etmək məqsədilə Amerika Birləşmiş Ştatlarının Nyu-York şəhərində işgüzar səfərdə olan Milli Məclisin sədri Sahibə Qafarova hadisə ilə bağlı məlumat aldıqdan sonra Fazil Mustafanın ailəsi ilə əlaqə saxlamış, onun vəziyyəti ilə maraqlanmışdır.

Neftçala rayonunda 2022-2023-cü tədris ilində təhsil, idman sahəsində Respublika və zona yarışlarında qalibiyyət əldə edən istedadlı gənclərlə görüş keçirilib.

Neftçala Rayon İcra Hakimiyyətində 2022-2023-cü tədris ilində təhsil, idman sahəsində Respublika və zona yarışlarında qalibiyyət əldə edən istedadlı gənclərlə görüş keçirilib.

Görüşdə Neftçala Rayon İcra Hakimiyyətinin başçısı Mirhəsən Seyidov, RİH-in, Şirvan-Salyan Regional Təhsil İdarəsinin məsul şəxsləri, məktəb direktorları, müəllimlər, şagirdlər və onların valideynləri iştirak edib.

İlk öncə Ulu Öndər Heydər Əliyevin, Azərbaycan Respublikasının ərazi bütövlüyünün, müstəqilliyinin, konstitusiya qurluşunun müdafiəsi zamanı şəhid olan hərbi qulluqçuların əziz xatirəsi bir dəqiqəlik sükutla yad edilib və Azərbaycan Respublikasının Dövlət Himni səsləndirilib.

Görüşdə çıxış edən Şirvan-Salyan Regional Təhsil İdarəsinin Təhsildə keyfiyyətə nəzarət sektorunun müdiri Vüqar Dadaşov, Şirvan-Salyan Regional Təhsil İdarəsi Neftçala təhsil sektorunun müdiri Nicat Cəfərov, Neftçala rayon Gənclər İdman İdarəsinin rəisi Araz Əhmədov, Aşağı Surra kənd tam orta məktəbinin təşkilatçısı, Azərbaycan dili və ədəbiyyat müəllimi, şair-publisist Elnur Abdıyev, Neftçala şəhər 4 saylı orta məktəbin direktoru Şəfəq Balaşova, Neftçala MX PHŞ-ın həkim onkoloqu, sığortanın təşkili və innovasiya şöbəsinin müdiri Könül Qafarova, Zabil Əsgərov adına Aşağı Surra kənd tam orta məktəbinin şagirdi Məhəmməd Rəsulzadə və ağır atletika üzrə idman ustası Kənan Xəlilov 2022-2023-cü tədris ilində əldə olunan uğurlar, təhsil, idman sahəsinə ayrılan diqqət və qayğıdan danışan natiqlər göstərilən diqqət, qayğıya görə Azərbaycan Respublikasının Prezidenti İlham Əliyev və Birinci vitse-prezident Mehriban xanım Əliyevaya minnətdarlıqlarını bildiriblər.

Çıxış edən Neftçala RİH-in başçısı Mirhəsən Seyidov Ulu Öndər Heydər Əliyevin xalqın təkidilə yenidən hakimiyyətə qayıdışından sonra bütün sahələrə olduğu kimi təhsil sahəsinə ayrılan xüsusi diqqət və qayğıdan, Ulu Öndər siyasətini uğurlar davam etdirən Prezident cənab İlham Əliyevin təhsil sahəsinə olan xüsusi diqqətindən və son illərdə təhsil sahəsində görülən işlər haqqında danışıb. 2022-2023-cü tədris ilində rayonumuz üçün qazanılan uğurların digər rayonlardan yüksək olmasını diqqətə çatdıran RİH-in başçısı bu uğurların davamlı olmasını, növbəti tədris ilində daha yüksək nəticələrin əldə olunmasını şagird və müəllim kollektivinə arzulayıb.

Tədbirin sonunda 2022-2023-cü tədris ilində təhsil, idman sahəsində Respublika və zona yarışlarında qalibiyyət əldə edən istedadlı gənclər, müəllimlər fəxri fərman ilə təltif olunub və xatirə şəkili çəkilib.

Ekologiya və Təbii Sərvətlər Nazirliyinin verdiyi məlumata əsasən, martın 30-dan başlayaraq iki gün ərzində ölkə ərazisində hava şəraitinin güclü külək və yağışla müşahidə olunan kəskin dəyişməsi gözlənilir.

YAZTV xəbər verir ki, Daxili İşlər Nazirliyinin Baş Dövlət Yol Polisi İdarəsi verilən xəbərdarlıqla əlaqədar yollarda yarana biləcək yol qəzaları və digər xoşagəlməz halların qarşısının alınması üçün hərəkət iştirakçılarına müraciət edərək, onlardan yola çıxarkən ehtiyatlı olmağı, yol hərəkəti qaydalarına ciddi riayət etməyi, digər hərəkət iştirakçılarına, xüsusilə piyadalara qarşı diqqətli davranmağı xahiş edir.

Qoşqulu, tentli, uzun ölçülü yük avtomobillərinin sahibləri və sürücüləri daha məsuliyyətli olmalı, küləkli hava şəraitində hərəkətin çətin və təhlükəli olduğunu unutmamalı, daşıdıqları yükün qablaşdırılmasına xüsusi diqqət yetirməlidirlər. Nəqliyyat vasitələrini sürüşmə, uçulma, qırılma, aşma ehtimalı yüksək olan obyektlərdən kənarda saxlanılmalı, park edərkən qapalı məkanlara üstünlük verilməlidir.

Piyadalar isə havanın küləkli və yağışlı olmasını nəzərə almalı, yollarda özlərinin və digər hərəkət iştirakçılarının həyat və sağlamlığına təhlükə yaradan davranışlardan çəkinməlidirlər.

Daxili İşlər Nazirliyinin (DİN) Mətbuat Xidmətinin şöbə rəisi, polis polkovnik-leytenantı Elşad Hacıyev Milli Məclisin deputatı Fazil Mustafanın paytaxtın Sabunçu rayonunda yaşadığı evin qarşısında odlu silahdan açılmış atəş nəticəsində xəsarət alması faktı ilə bağlı əhaliyə müraciət edib.

YazTV xəbər verir ki, müraciətdə deyilir:

"Millət vəkili Fazil Mustafaya qarşı törədilən cinayət faktı ilə bağlı rəsmi olaraq təsdiq olunmayan və dəqiqləşdirilməyən məlumatları yaymayın. Cinayəti törətməkdə şübhəli bilinən şəxsin, yaxud şəxslərin tutulması istiqamətində tədbirlər görülür".