Wednesday, 29 İyun 2022 22:21
Yeni Azərbaycan Televiziyası
Bakı
İstanbul
Moskva
"Zirə" Boludakı ilk yoxlama matçında uduzub

"Zirə" Boludakı ilk yoxlama matçında uduzub

Türkiyənin Bolu şəhərində təlim-məşq toplanışında olan "Zirə" ilk yoxlama oyununu keçirib.

YAZTV-nin məlumatına görə, "qartallar" Rumıniyanın I Liqasında çıxış edən "Hermanştadt"la qarşılaşıb. "Koru" otelin meydançasında baş tutan görüş Rəşad Sadıqovun rəhbərlik etdiyi komandanın 1:2 hesablı məğlubiyyəti ilə başa çatıb.

Qarşılaşmada hesabı "Zirə" açıb. Hamidu Keyta 25-ci dəqiqədə fərqlənib. İlk hissə Azərbaycan təmsilçisinin minimal hesablı üstünlüyü ilə başa çatsa da, rəqib ikinci yarıda geri dönüş edərək, qələbə qazanıb.

Qeyd edək ki, "Zirə"nin Bolu toplanışında daha 2 yoxlama oyunu nəzərdə tutulub.

Meksika yığmasının keçmiş kapitanı "Barselona"ya qayıdır

Meksika yığmasının keçmiş kapitanı "Barselona"ya qayıdır

Meksika yığmasının sabiq futbolçusu Rafael Markes İspaniya "Barselona"sına qayıdacaq.

YAZTV "sport.es"ə istinadən məlumatına görə, millinin keçmiş kapitanı Kataloniya klubunun hazırda "Barselona Atletik" adlanan B komandasında baş məşqçi Serxi Barxuanı əvəzləyəcək.

43 yaşlı sabiq müdafiəçi "Barselona"nın əsas komandasında 7 mövsüm çıxış edib. Markes karyerasını Meksika "Atlas"ında başa vurub. O, yalnız ortabab "Alkala"nın gənclər komandasında iş təcrübəsinə malikdir.

Qeyd edək ki, Rafael Markes 5 dünya çempionatında Meksika yığmasının kapitanı olub.

Yeni baş məşqçinin "Neftçi"dəki qazancı müəyyənləşib

Yeni baş məşqçinin "Neftçi"dəki qazancı müəyyənləşib

"Neftçi"nin yeni baş məşqçisi Laurentsiu Regekampfın alacağı əmək haqqının məbləği müəyyənləşib.

YAZTV "Prosport"a istinadən məlumatına görə, rumıniyalı mütəxəssis bir mövsümünə 480 000 avro qazanacaq. Bu isə ayda 40 000 avro deməkdir.

O, "Universitatya Krayova"da ayda 15 000 avro qazanıb.

Üstəlik, Regekampfa transferlər zamanı sərbəstlik və "Neftçi"ni UEFA Konfrans Liqasının qrupuna çıxaracağı təqdirdə, bonus veriləcək.

Qeyd edək ki, Laurentsiu Regekampf ilə 2 illik müqavilə bağlanılıb.

Azərbaycanda daha 3 idman federasiyası ləğv olunub

Azərbaycanda daha 3 idman federasiyası ləğv olunub

Azərbaycanda daha 3 idman qurumunun federasiya statusu dayandırılıb.

Gənclər və İdman Nazirliyinin mətbuat xidmətindən  verilən məlumata görə, bunlar “Həvəskar Universal Döyüş Federasiyası” İB, “Qarabağ-Əlil Döyüşçülər Futbol Federasiyası” İB, “Azərbaycan Peşəkar Boks Federasiyası” İB-nin federasiya statusu dayandırılıb.

Əvəzində kollegiyanın qərarı ilə “Azərbaycan Sambo Federasiyası” İB, “Azərbaycan Savat Federasiyası” İB, “Azərbaycan Taekvondo Federasiyası” İB, “Azərbaycan Avtomobil Federasiyası İB, “Azərbaycan Kapoeyra Federasiyası” İB, “Azərbaycan Yelkən Federasiyası” İB-nin akkreditasiyaları təsdiqlənib.

Beləliklə, bir-neçə aydır nazirliyin nəzdində fəaliyyət göstərən xüsusi komissiyanın təqdimatına əsasən, Kollegiya qərarı ilə bu günədək statusu təsdiqlənmiş federasiyaların sayı 26-ya çatıb. Ümumilikdə, 25 federasiyanın isə statusu dayandırılıb. Federasiyaların statusuna baxılması prosesi davam edir.

Bununla yanaşı, iclasda nazirliyin 2022-сi ilin IIk yarımili üçün perspektiv iş planı təsdiqlənib. Bundan başqa, bir sıra tədbirlərin təqdimatı müzakirə edilib və müvafiq qərarlar qəbul edilib.

Nəhayət, Ceyhun Ənvər oğlu Məmmədəliyevə, Tural Rafiq oğlu Vəlibəyova və Xalid Zahid oğlu Atababayevə “Azərbaycan Respublikasının Əməkdar məşqçisi” fəxri adının verilməsi barədə qərar qəbul edilib.

"Bavariya"da ötən mövsümün ən yaxşı futbolçusu bəlli olub

"Bavariya"da ötən mövsümün ən yaxşı futbolçusu bəlli olub

Almaniyanın "Bavariya" klubunda ötən mövsümün ən yaxşı futbolçusu müəyyənləşib.

YAZTV Münhen təmsilçisinin rəsmi saytına istinadən xəbər verir ki, azarkeşlərin səsverməsi nəticəsində bu ada Tomas Müller layiq görülüb.

33 yaşlı hücumçunu komandanın yarımmüdafiəçisi Camal Musiala izləyib. Polşalı forvard Robert Levandovski isə üçüncü olub.

Qeyd edək ki, Tomas Müller ötən mövsüm meydana çıxdığı 45 matçda 13 qol və 25 məhsuldar ötürmə ilə yadda qalıb. Onun Bundesliqanın son çempionu ilə 2024-cü ilin yayınadək müqaviləsi var.

"Qalatasaray"ın baş məşqçisi istefaya göndərilib

"Qalatasaray"ın baş məşqçisi istefaya göndərilib

Türkiyə "Qalatasaray"ı baş məşqçisi Domenek Torrenlə yollarını ayırıb.

YAZTV klubun rəsmi saytına istinadən xəbər verir ki, İstanbul təmsilçisi ispaniyalı mütəxəssislə müqaviləni pozub.

60 yaşlı baş məşqçi ilə yanaşı, onun köməkçiləri də istefaya göndərilib. Torreni "Cim-Bom"un sabiq futbolçusu Okan Burukun əvəzləyəcəyi gözlənilir.

Qeyd edək ki, Domenek Torren bu ilin yanvarında "Qalatasaray"ın sükanı arxasına keçmişdi. Onun klubla 2023-cü ilin yayınadək müqaviləsi var idi.

"Qarabağ"ın legioneri: "Lex"lə oyunlarda da hücum futbolu göstərəcəyik"

"Qarabağ"ın legioneri: "Lex"lə oyunlarda da hücum futbolu göstərəcəyik"

“İlk oyunumuzu səfərdə keçirəcəyik. Lakin həmişə hücum futbolu sərgiləyirik. Yəqin ki, yenə belə olacaq”.

YAZTV-nin məlumatına görə, bunu “Qarabağ”ın futbolçusu Marko Veşoviç UEFA Çempionlar Liqasının I təsnifat mərhələsində Polşa “Lex”inə qarşı keçirəcəkləri görüşlər barədə danışarkən deyib.

Monteneqro millisinin müdafiəçisi ilk matçın Poznanda keçirilməsinin Azərbaycan klubunun lehinə olduğunu bildirib: “Cavab matçını evdə keçirməyimiz yaxşıdır. Poznandan əlverişli nəticə ilə dönmək vacibdir. Öz stadionumuzda yaxşı atmosfer olur. Ona görə də daha asan olacaq”.

“Qarabağ”dan əvvəl 2018 - 2021-ci illərdə Polşada “Legiya”nın formasını geyinmiş Veşoviç orada xoşagəlməz anlar yaşadığını etiraf edib: “Klubdakı insanlarla problemim var idi. Mənə sayqı ilə yanaşdıqlarını hiss etmədim. Bərpa dönəmindəki hərəkətləri mənə hörmət etmədiklərini göstərdi. Ailəm və hətta azarkeşlər də nə baş verdiyini bilirdilər. Onlar mənə xanımıma görə yeni müqavilə təklif etmədilər”.

Qeyd edək ki, “Qarabağ” “Legiya” ilə ilk oyununu iyulun 5-də səfərdə, cavab görüşünü isə bir həftə sonra evdə keçirəcək.

İspaniya klubları "Qarabağ"ın legioneri ilə maraqlanır

İspaniya klubları "Qarabağ"ın legioneri ilə maraqlanır

"Qarabağ"ın futbolçusu Qaspar Panadero yenidən vətəni İspaniyada çıxış edə bilər.

YAZTV yerli mətbuata istinadən məlumatına görə, 25 yaşlı yarımmüdafiəçi Sequnda təmsilçiləri - "Kartaxena", "Albasete", "Burqos" və "Luqo"nun maraq dairəsinə düşüb.

Ağdam klubunun futbolçunu yenidən icarəyə verəcəyi gözlənilir.

Qeyd edək ki, Qaspar Panadero "Qarabağ"a 2021-ci ilin avqustunda İspaniyanın "Kadis" klubundan transfer olunub. Ötən mövsümün ikinci yarısını icarə əsasında Kiprin AEK (Larnaka) komandasında keçirmiş vingerin "köhlən atlar"la 2024-cü ilin yayınadək müqaviləsi var.

Çempionlar Liqasında yeni mövsümə start verilib

Çempionlar Liqasında yeni mövsümə start verilib

UEFA Çempionlar Liqasında 2022/2023 mövsümünə start verilib.

YAZTV xəbər verir ki, mövsüm San Marinonun "La Fiorita" və Andorranın "İnter" komandaları arasında ilkin mərhələnin yarımfinal matçı ilə başlayıb. İslandiyanın paytaxtı Reykyavikdə keçirilən qarşılaşma Andorra təmsilçisinin 2:1 hesablı qələbəsi ilə başa çatıb.

Digər yarımfinal oyununda "Estoniya" "Levadiya"sı İslandiya "Vikinqur"u ilə üz-üzə gələcək. Bu gün keçiriləcək görüş Bakı vaxtı ilə saat 23:30-da start götürəcək. Cütün qalibi finalda "İnter"in rəqibi olacaq. Həlledici oyun iyunun 24-də gerçəkləşəcək.

Qeyd edək ki, ilkin mərhələnin qalibi növbəti raundda İsveç "Malmö”sü ilə qarşılaşacaq.

Qurban Qurbanov Avropa çempionatının finalında

Qurban Qurbanov Avropa çempionatının finalında

İtaliyanın paytaxtı Romada güləş üzrə U-20 Avropa çempionatı davam edir.

YAZTV xəbər verir ki, qitə birinciliyinin ikinci günündə 60, 67, 72, 82 və 97 kq-da yer alan yunan-Roma güləşçiləri mübarizəyə qoşulub.

Nihat Məmmədli (60 kq) ilk mərhələdə alman Eugen Şellə heç bir şans tanımayıb - 8:0. Növbəti mərhələdə polşalı Oliver Şkripçakı vaxtından əvvəl xalçadan məyus yola salan (13:5) güləşçimiz yarımfinalda erməni Suren Ağacanyanla bacarmayıb - 1:9. Nihat bürünc medal uğrunda güləşəcək.

Kənan Abdullazadə (67 kq) təsnifat mərhələsində fransalı Maqomed Qataqayevi minimal fərqlə (3:2), 1/8 finalda isə litvalı Rokas Çepauskası sonuncu xal prinsipinə əsasən (4:4) üstələyib. 1/4 finalda macar Amadeuş Vitek üzərində təmiz qələbə (8:0) qazanan pəhləvanımız yarımfinalda gürcü Nika Broladzeyə uduzub - 1:4. Kənan bürünc medal görüşünə çıxacaq.

Qurban Qurbanov (72 kq) yarışa inamlı start verib. Güləşçimiz rəqiblərinə göz açmağa imkan verməyib. Belə ki, Qurban sırayla norveçli Marius Dalsbotten (9:0), gürcü Temuri Orconikidze (8:0), isveçrəli David Loher (11:0) və ukraynalı İrfan Mirzoyevə (8:0) tam üstünlüklə qalib gələrək adını finala yazdırıb. Qurbanov həlledici qarşılaşmada macar Attila Toesmaqiylə üz-üzə gələcək.

Rauf Əliyev (82 kq) ilk görüşdə slovakiyalı Matyas Şeylerdən güclü olub - 3:0. Ancaq 1/4 finalda gürcü Açiko Bolkvadze keçilməz olub - 1:6. Rəqib finala yüksəldiyi üçün Əliyev təsəlliverici görüşə çıxacaq. Mingəçevir güləş məktəbinin yetirməsi ukraynalı Ruslan Abdiyevlə qarşılaşacaq.

Qeyd edək ki, bu çəkilərdə təsəlliverici və medal görüşləri iyunun 29-da keçiriləcək.

Mahir Emreli "Dinamo"nun məşqlərinə qoşulub

Mahir Emreli "Dinamo"nun məşqlərinə qoşulub

Azərbaycan millisinin futbolçusu Mahir Emreli çıxış etdiyi Xorvatiyanın "Dinamo" (Zaqreb) komandasına qoşulub.

YAZTV paytaxt təmsilçisinin rəsmi saytına istinadən xəbər verir ki, 25 yaşlı hücumçu təlim-məşq toplanışının əsas mərhələsi üçün bu gün komanda ilə birlikdə Sloveniyaya yollanıb.

Son ölkə çempionu hazırlıq çərçivəsində 2 yoxlama matçı keçirəcək. Rəqiblər Şimali Makedoniyanın "Şkendiya" klubu və yerli Trnava "Spartak"ıdır. Qarşılaşmalar müvafiq olaraq, iyunun 26-da və iyulun 1-də baş tutacaq.

Qeyd edək ki, Mahir Emreli Azərbaycan yığmasının UEFA Millətlər Liqasındakı oyunlarında iştirak etdiyi üçün "Dinamo"nun toplanışına gec qatılıb.

AFFA U-21 millisinin baş məşqçisi ilə vidalaşıb

AFFA U-21 millisinin baş məşqçisi ilə vidalaşıb

AFFA 21 yaşadək futbolçulardan ibarət Azərbaycan milli komandasının baş məşqçisi Milan Obradoviçlə vidalaşıb.

YAZTV milli assosiasiyanın rəsmi saytına istinadən xəbər verir ki, serbiyalı mütəxəssislə başa çatan müqavilənin müddəti uzadılmayıb.

AFFA Obradoviçə U-21yığmasında fəaliyyətinə görə təşəkkür edib, gələcək karyerasında uğurlar arzulayıb.

Bildirilib ki, millinin baş məşqçisi vəzifəsinə təyinatla bağlı əlavə məlumat veriləcək.