Monday, 30 Yanvar 2023 06:16
Yeni Azərbaycan Televiziyası
Bakı
İstanbul
Moskva
“Kinokonsert” multimedia şousu

“Kinokonsert” multimedia şousu

Fevralın 24-də Üzeyir Hacıbəyli adına Bakı Musiqi Akademiyasının (BMA) nəzdində yerləşən Opera Studiyasında "Kinokonsert" adlı multimedia şousu təqdim olunacaq.

BMA-nın mətbuat xidmətindən YAZTV-ə verilən məlumata görə, “Avanqard” Kamera Orkestrinin təqdimatında “Azərbaycanfilm” kinostudiyasının 100, Azərbaycan kinosunun 125 illiyinə həsr olunmuş konsert proqramında yüksək bədii zövqlə yeni aranjeman edilmiş milli kinomuzun parlaq nümunələrindən olan musiqi əsərləri səsləndiriləcək.

Qeyd edək ki, orta və yaşlı nəslin nümayəndələri səsləndirilən nostalji musiqi nömrələrinin sayəsində gənclik illərini, yaşadıqları anları xoş xatirələr kimi yada salmaq imkanına sahib olacaqlar.

Biletləri iTicket.az saytı və şəhərin kassalarından əldə etmək mümkündür.

İstanbulda keçirilən 4.Maltepe Beynəlxalq Teatr festivalı yekunlaşıb

İstanbulda keçirilən 4.Maltepe Beynəlxalq Teatr festivalı yekunlaşıb

Avrasiya Teatrlar Birliyinin xətti ilə İstanbulda keçirilən 4.Maltepe Beynəlxalq Teatr festivalının bağlanış mərasimi keçirilib. Türkiyənin tanınmış iş adamlarının və rəsmi şəxslərin iştirak etdiyi festivalda 11 ölkədən 165 iştirakçıya "Ən yaxşı kişi oyunçu", "Ən yaxşı qadın oyunçu", "Ən yaxşı geyim" və s. üzrə mükafatlar təqdim olunub.
 
Qeyd edək ki, festivalda ölkəmizi Gəncə Dövlət Dram Teatrının direktoru Aqil Bəhramlı və Avrasiya Teatrlar Birliyinin Azərbaycan təmsilçisi, teatrın aktyoru Yusif Cəfərov təmsil ediblər.
 
Cavanşir Quliyev 19 ildən sonra birdəfəlik Azərbaycana qayıtdı

Cavanşir Quliyev 19 ildən sonra birdəfəlik Azərbaycana qayıtdı

Əməkdar incəsənət xadimi, məşhur bəstəkar Cavanşir Quliyev Şimali Kipr Türk Cümhuriyyətindən Azərbaycana köçüb.

YAZTV xəbər verir ki, bu barədə Diasporla İş üzrə Dövlət Komitəsinin Təbliğat, informasiya və analitik təhlil şöbəsinin müdiri Vəsilə Vahidqızı feysbukda bildirib.

“Cavanşir Quliyev 19 ildən sonra birdəfəlik Azərbaycana qayıtdı”, - o yazıb.

C. Quliyev məlumatı saytımıza təsdiqləyib. 

Qeyd edək ki, C. Quliyev müasir Azərbaycanın ilk hərbi marşının müəllifidir.

Qırğızıstanda fonoqram oxumaq qadağan olundu

Qırğızıstanda fonoqram oxumaq qadağan olundu

Qırğızıstanda müğənnilərə fonoqram oxumaq qadağan edilib.

YAZTV xəbər verir ki, bununla bağlı Qırğız Respublikasının mədəniyyət, informasiya, idman və gənclər naziri Altınbek Maksutov əmr imzalayıb.

2023-cü il yanvarın 1-dən qüvvəyə minən əmrə əsasən, Qırğızıstanda artistlərə kütləvi tədbirlərdə və bütün dövlət mədəni-maarif müəssisələrində fonoqram altında çıxış etmək qadağan olunur.

Fonoqramla bağlı qadağa teatrlarda, filarmoniya və konsert zallarında, kinoteatr, klub, muzey və kitabxanalarda, eləcə də idman müəssisələrində keçirilən tədbirlərə də şamil edilir.

Avrasiya Teatrlar Birliyi beynəlxaq festival çərçivəsində fəaliyyətini davam edir

Avrasiya Teatrlar Birliyi beynəlxaq festival çərçivəsində fəaliyyətini davam edir

Avrasiya Teatrlar Birliyinin xətti ilə İstanbulda keçirilən beynəlxalq teatr festivalında Avrasiya Teatrlar Birliyi öz işinə başlayıb. Bu gün festival çərçivəsində Birliyin ilk toplantısı keçirilibş. Toplantıda əsasən, növbəti teatr festivallarının hansı ölkələrdə keçiriləcəyini, festivalların məqsədi və digər məsələləri müzakirə olunub. Birliyin işi cari ilin 9 oktyabr tarixində yekunlaşdıraraq.

Xatirladaq ki, Avrasiya Teatrlar Birliyində ölkəmizi Gəncə Dövlət Dram Teatrının aktyoru Yusif Cəfərov təmsil edir.

Gəncə Dövlət Dram Teatrında "Kral ölür" adlı absurd komediya hazırlanır

Gəncə Dövlət Dram Teatrında "Kral ölür" adlı absurd komediya hazırlanır

Gəncə Dövlət Dram Teatrının səhnəsində Ejen İoneskonun “Kral ölür” adlı absurd komediyasının hazırlıq prosesi başlanıb.

Tamaşanın quruluşçu rejissoru S.Vurğun adına Azərbaycan Dövlət Akademik Rus Dram Teatrının rejissoru Tural Mustafayev, quruluşçu rəssamı Azərbaycan Dövlət Gənc Tamaşaçılar Teatrının baş rəssamı Mustafa Mustafayev, rejissor Yusif Cəfərov, rejissor assisenti Dursun Cəlilova, musiqi tərtibatı Vüsalə Bədəlovadır.

Əsas rollarda Xalq artisti Pərvanə Qurbanova, Əməkdar artist Elxan Yunis, digər rollarda isə Əməkdar artistlər Sevda Orusova, İlham Hüseynov, aktyorlar Günay Cabbarova, Ruslan Hüseynov iştirak edəcəklər.

Əsərdə hadisələr Beranje krallığında birinci Beranjenin sarayında baş verir. Günlərin birində kral bir neçə saatdan sonra öləcəyini öyrənir. Ölümün adi sözlə, iki-üç kəlmə ilə çatdırılması Beranje üçün gülməli və qeyri-təbii təsir bağışlayır. Lakin zaman axını davam etdikcə kral vəziyyətin ciddiləşdiyini ətrafındakı insanların onu taleyi ilə baş-başa buraxdıqlarını anlayıb məyus olur. Bu məyusluq o qədər güclü olur ki, bir az əvvəl ölmərəm deyib hayqıran Beranje ölümə öz xoşu ilə razılıq verib əcəllə sazişə gedir.

Qeyd edək ki, tamaşanın premyerası cari ilin oktyabr ayı üçün nəzərdə tutulub.

 

 

 

Gəncə Dövlət Kukla Teatrında “Dərdlərimin çamadanı" adlı mono tamaşa nümayiş olunub

Gəncə Dövlət Kukla Teatrında “Dərdlərimin çamadanı" adlı mono tamaşa nümayiş olunub

16 dekabr 2022-ci il tarixində Gəncə Dövlət Kukla Teatrında 2022-ci il "Şuşa İli" çərçivəsində teatr tərəfindən hazırlanmış “Dərdlərimin çamadanı" adlı mono tamaşaya ictimai baxış keçirildi.
Tamaşada Gəncə Regional Mədəniyyət İdarəsinin rəisi Vasif Cənnətov, Gəncə Dövlət Filarmoniyasınin direktoru Rəşad Yusibov, Dövlət İmtahan Mərkəzinin Gəncə Regional bölməsinin rəhbəri Nəsimi Məmmədov, Qərb bölgəsi üzrə teatrşünas – tənqidçi Anar Bürcəliyev, şəhid ailələri və şəhər ictimaiyyəti iştirak etmişlər.

Müəllifi Hafiz Ataxanlı, quruluşçu rejissoru, Respublikanın Əməkdar artisti Fərmail Paşayev, quruluşçu rəssamı Məhəmməd Hacıyev, musiqi tərtibatçısı Şamil Məmmədli olan tamaşada əsas rolun ifaçısı Zülfiyyə Əliyeva idi.

Tamaşa vaxtı ilə Şuşadan məcburi köçkün olmuş 12 yaşlı qızın həyat hekayəsindən bəhs edir. Beş nəfərlik xoşbəxt ailədən yalnız o sağ qalır. Doğmalarını itirən qız onların əşyalarını xatirə olaraq çamadana toplayır və illər uzunu özü ilə gəzdirir. Ən böyük təsəllisi çamadanda gəzdirdiyi əşyalardır.

Qeyd edək ki, 2022-ci il 25-30 noyabr tarixlərində Azərbaycan Respublikası Mədəniyyət Nazirliyi və Teatro.az saytının təşkilatçılığı ilə təşkil olunan II 4.4 Qısa Tamaşalar Festivalında “Dərdlərimin çamadanı” mono tamaşasındakı ifasına görə aktrisa Zülfiyyə Əliyeva “Münsiflərin Rəğbəti” mükafatına layiq görülmüşdür.

Sonda Gəncə Regional Mədəniyyət İdarəsinin rəisi Vasif Cənnətov Kollektivə minnətdarlığını bildirmiş və 2022-ci ildə Mədəniyyət idarəsi ilə sıx əməkdaşlıq etdiyinə görə Gəncə Dövlət Kukla Teatrına Təşəkkürnamə təqdim etmişdir.

Gəncə Dövlət Dram Teatrının direktoru Beynəlxalq festivalda ölkəmizi təmsil edir

Gəncə Dövlət Dram Teatrının direktoru Beynəlxalq festivalda ölkəmizi təmsil edir

Cari ilin 6-9 oktyabr tarixlərində İstanbulda Türkiyənin ən məşhur festivallarından biri olan 4.Maltepe Beynəlxalq Teatr Festivalına start verilib. Festival Avrasiya Teatrlar Birliyinin xətti ilə gerçəkləşir. Azərbaycandan Gəncə Dövlət Dram Teatrının direktoru Aqil Bəhramlı və Avrasiya Teatrlar Birliyinin Azərbaycan təmsilçisi, teatrın aktyoru Yusif Cəfərov festivalda iştirak edirlər.
 
Qeyd edək ki, sözügedən festivalda Gəncə Dövlət Dram Teatrının direktoru Aqil Bəhramlı Beynəlxalq münsiflər heyətinin tərkibində yer alıb.
 
Xatırladaq ki, bu il keçirilən 4.Maltepe Beynəlxalq Teatr Festivalına 11 ölkədən 150 sənətçi qatılıb.
 
Azərbaycanın əməkdar rəssamı Asif Azərelli vəfat edib

Azərbaycanın əməkdar rəssamı Asif Azərelli vəfat edib

Azərbaycan Respublikasının əməkdar rəssamı Asif Azərelli (Asif Hüseyn oğlu Rzayev) 77 yaşında vəfat edib.

Bu barədə  rəssamın yaxınları məlumat veriblər.

Qeyd edək ki, Asif Azərelli 19 iyul 1946-cı ildə Bərdə rayonun Uğurbəyli kəndində anadan olub.

1980-ci ildə SSRİ Rəssamlar İttifaqına üzv olub. 1983-1984-cü illərdə UNESCO tərəfindən təşkil olunmuş beynəlxalq sərginin iştirakçısı olub. Vəfatınadək Azərbaycan Dövlət Rəssamlıq Akademiyasında dosent vəzifəsində çalışıb.

 A.Azərelli 2015-ci ildə Azərbaycanın Əməkdar rəssamı fəxri adına layiq görülüb.

Əsərləri (“Şuşa”, “Kəlbəcər”, “Qarabağlı qoca”, “Belə haqsızlıq olarmı?”, “Zəngilan toyu”, “Dədə Qorqud” və s.) Fransa, Almaniya, İran, Ukrayna, Rusiya, Türkiyə və Özbəkistanda keçirilmiş sәrgilәrdә nümayiş etdirilib.

Allah rəhmət eləsin!

Azərbaycan bəstəkarı Rauf Hacıyevin 100 illiyinə həsr olunmuş konsert proqramı keçirilib.

Azərbaycan bəstəkarı Rauf Hacıyevin 100 illiyinə həsr olunmuş konsert proqramı keçirilib.

Azərbaycan Respublikasının Mədəniyyət Nazirliyinin təşkilatçılığı ilə keçirilən görkəmli Azərbaycan bəstəkarı Rauf Hacıyevin 100 illiyinə həsr olunmuş Musiqi Festivalı çərçivəsində Azərbaycan Respublikasının Mədəniyyət Nazirliyinin, Gəncə Şəhər İcra Hakimiyyətinin, Gəncə Regional Mədəniyyət İdarəsinin dəstəyi və F.Əmirov adına Gəncə Dövlət Filarmoniyasının təşkilatçılığı ilə Gəncə Dövlət Filarmoniyasında konsert proqramı keçirilib.

Konsertdə Azərbaycan Respublikasının Mədəniyyət Nazirliyinin İncəsənət şöbəsinin baş məsləhətçisi Turan Məmmədəliyeva, Gəncə Regional Mədəniyyət İdarəsinin rəisi Vasif Cənnətov, Rauf Hacıyevin ailə üzvləri, idarə, müəssisə, təşkilat rəhbərləri və şəhər ictimaiyyəti iştirak ediblər.

Konserti Gəncə Dövlət Filarmoniyasının Kamera Orkestri (bədii rəhbər və baş dirijor Respublikanın Xalq artisti Rafael Bayramov) və "Xəmsə" estrada qrupu (bədii rəhbər Şəhriyar Tağıyev) təqdim etmişlər.

Konsert proqrqmı tamaşaçılar tərəfindən yüksək rəğbətlə qarşılanıb.

 
“Şəhid atan sizin pulunuzu ödəyib” – AzTV-də təsirli layihə başlayır VİDEO

“Şəhid atan sizin pulunuzu ödəyib” – AzTV-də təsirli layihə başlayır VİDEO

Azərbaycan Televiziyası 44 günlük Vətən müharibəsinin ikinci ildönümündə yeni layihəyə start verib.

AzTV-nin İctimaiyyətlə əlaqələr və sosial media şöbəsindən verilən məlumata görə, “Əmanət” adlı layihə qısametrajlı filmlər silsiləsindən ibarətdir.

Bədii-sənədli filmlərdə şəhid ailələrinə və övladlarına, qazilərə cəmiyyətin və dövlətin qayğısı, diqqəti əks olunur. Filmlərin ssenarisi real hadisələrə əsasən qələmə alınıb.

Silsilənin ilk filmi “Şəhid əmanəti” adlanır və Vətən müharibəsi şəhidi Natiq İsmayılovun ailəsinin danışdıqlarına əsasən çəkilib.

Belə ki, şəhidin oğlu Davud İsmayılzadə filmin baş qəhrəmanıdır. O, çörək almağa gedir və yolda ona qarşı xüsusi diqqət göstərən qonşuları ilə qarşılaşır. Çörək almaq üçün daxil olduğu dükanda isə satıcı şəhid ailəsi olduğu üçün ondan pul almır və “şəhid atan sizin pulunuzu ödəyib” deyərək yola salır.

Filmin rejissoru Elvin Əhmədoğlu, ssenari müəllifi Vasif Ənvəroğlu, prodüseri Zamiq Əlövsətoğludur.

Qeyd edək ki, Azərbaycan Silahlı Qüvvələrinin mayoru Natiq İsmayılov 17.10.2020-ci ildə Füzuli rayonu uğrunda gedən döyüşlərdə şəhid olub.

N.İsmayılovun 4 övladı – Ömər İsmayılzadə, Behbud İsmayılzadə, Gülər İsmayılzadə və Davud İsmayılzadə Vətənə əmanət qalıb.

https://www.youtube.com/watch?v=AE7p4ISdEG0

“Qardaşlıq Dastanı” Azərbaycanda nümayiş olunacaq

“Qardaşlıq Dastanı” Azərbaycanda nümayiş olunacaq

Mədəniyyət Nazirliyi və Yunus Emre İnstitutunun Bakıdakı filialının dəstəyi ilə “Qardaşlıq Dastanı” Teatral Rəqs Nümayişi layihəsi həyata keçiriləcək.

Bu barədə  nazirlikdən məlumat verilib.

Serhat Turakın bədii rəhbərliyi, Alagöz Kültür Sanatın istehsalı və “Umya Az” MMC-nin (Umya Medya-Türkiyə) rəsmi təşkilatçılığı ilə bu layihə dünya turuna çıxmağa başlayır. Tədbir 29-31 oktyabrda Bakıda Heydər Əliyev Sarayında, 2 və 3 noyabrda isə Gəncə Dövlət Filarmoniyasında baş tutacaq.

Layihə 6 illik araşdırma və 18 aylıq səhnə məşqlərindən sonra, 100-dən çox türkiyəli və azərbaycanlı rəqqas və teatr aktyorunun zəhməti ilə səhnələşdirilən möhtəşəm tarixi povesti ilə mədəni, epik və sənət əsəridir. Əsərdə eramızdan 2000 il öncə gedən qədim türk, Azərbaycan tarixi və mifologiyası, Nuh tufanından Qarabağ savaşına qədər Anadolu və Qafqaz xalqlarının amansız mübarizəsi, həmrəyliyi, həyat sevgisi, sevinc və kədəri, bir sözlə Azərbaycan və Türkiyə xalqlarının sarsılmaz qardaşlığı simvolik olaraq səhnəyə gətirilmişdir.

“Qardaşlıq Dastanı” layihəsi 2 pərdə və 12 səhnədən ibarətdir. İlk dəfə 2021-ci ildə Türkiyədə səhnəyə qoyulmuş və İstanbul, Ankara, İzmir, Konya və bir çox digər böyük şəhərlərdə nümayiş olunmuşdur. Umya Medya və Umya Az-ın rəsmi təşkilatçılığı ilə 2022-ci ildə dünya turuna çıxacaq ansamblın ilk dayanacağı Azərbaycan səhnəsi olacaqdır. Azərbaycandan sonra Almaniya, Şimali Avropa, Meksika, Özbəkistan, Qazaxıstan, Dubay, Misir, Qətər və Çində turlarını 2023-cü ilin sonuna qədər davam etdirəcək. “Qardaşlıq Dastanı” layihəsi ilə dünyanın 100-dən çox ölkəsində Azərbaycan və Türkiyənin qardaşlığını, iki ölkənin zəngin mədəni irsini və tarixini sənət yolu ilə dünya xalqlarına tanıtmaq məqsədi daşıyır.