Wednesday, 10 Avqust 2022 20:24
Yeni Azərbaycan Televiziyası
Bakı
İstanbul
Moskva
Zəngilanın İçəri Müşlan kəndindən - Video

Zəngilanın İçəri Müşlan kəndindən - Video

Müdafiə Nazirliyi Zəngilan rayonunun İçəri Müşlan kəndindən videogörüntülər yayıb. 

101.az həmin görüntüləri təqdim edir: 

https://www.youtube.com/watch?v=rDU3zM80t9A

Prezident İlham Əliyev pakistanlı həmkarını təbrik edib

Prezident İlham Əliyev pakistanlı həmkarını təbrik edib

Prezident İlham Əliyev Pakistan İslam Respublikasının Prezidenti Arif Alvini təbrik edib.

Təbrikdə deyilir: "Hörmətli cənab Prezident,

23 mart − Pakistan Günü münasibətilə Sizə və Sizin simanızda qardaş xalqınıza öz adımdan və Azərbaycan xalqı adından ən səmimi təbriklərimi və xoş arzularımı yetirirəm.

Azərbaycan Respublikası ilə Pakistan İslam Respublikası arasındakı əlaqələr ortaq tarixi, dini, mədəni köklərə malik qardaş xalqlarımızın iradəsindən qaynaqlanır. Belə möhkəm təməllər üzərində qurulmuş strateji tərəfdaşlıq münasibətlərimizin hazırkı yüksək səviyyəsi böyük məmnunluq doğurur.

Azərbaycanın ərazi bütövlüyünün bərpası ilə bağlı Pakistanın nümayiş etdirdiyi qəti və birmənalı mövqe, haqq işimizə göstərdiyi tərəddüdsüz dəstək və həmrəylik xalqımız tərəfindən olduqca yüksək qiymətləndirilir.

Mən Azərbaycan ilə Pakistan arasındakı dostluq və əməkdaşlıq münasibətlərinin inkişafına xüsusi əhəmiyyət verirəm. Əminəm ki, qarşılıqlı etimad, dəstək və həmrəyliyə əsaslanan dövlətlərarası münasibətlərimiz, həm ikitərəfli, həm də çoxtərəfli əsasda səmərəli əməkdaşlığımız birgə səylərimizlə bundan sonra da müvəffəqiyyətlə davam edəcək və genişlənəcəkdir.

Bu əlamətdar gündə Sizə möhkəm cansağlığı, xoşbəxtlik, işlərinizdə uğurlar, qardaş Pakistan xalqına daim əmin-amanlıq və firavanlıq arzulayıram".

Ərdoğandan Novruz təbriki

Ərdoğandan Novruz təbriki

Türkiyə Prezidenti Rəcəb Tayyib Ərdoğan Novruz bayramı ilə əlaqədar təbrik mesajı ünvanlayıb. 

YAZTV “Hürriyet”ə istinadən xəbər verir ki, təbrikdə bütün bəşəriyyətə daha firavan, daha ədalətli həyat arzulanıb:

“Baharın müjdəçisi, sülh və qardaşlığın simvolu Novruz gününü təbrik edirəm. Orta Asiyadan Anadolu və Balkanlara qədər geniş coğrafiyada min illərdir coşqu ilə qeyd olunan Novruzun işarə etdiyi birlik və həmrəylik duyğusunun bütün dünyaya kök salmasını və daimi olmasını diləyirəm.

Novruzun cücərtdiyi ümid və həyəcanla həm ölkəmiz, həm bölgəmiz, həm də bütün bəşəriyyət üçün daha firavan, daha ədalətli və daha güvənli gələcəyi qadını və kişisi ilə, gənci və yaşlısı ilə çiyin-çiyinə qurmağa davam edəcəyik.

Novruzun əziz millətimizə və bütün insanlığa əmin-amanlıq, bərəkət və müjdələr gətirməsinə ümid edir, bütün vətəndaşlarımızı səmimi-qəlbdən salamlayıram”. (qafqazinfo az)

MM: Azərbaycanda erməni əsirlərlə pis rəftar barədə sənəd qərəzlidir

MM: Azərbaycanda erməni əsirlərlə pis rəftar barədə sənəd qərəzlidir

Bu il martın 23-də Avropa Parlamentinin (AP) üzvləri, Avropa İttifaqı-Cənubi Qafqaz ölkələri üzrə Parlament Əməkdaşlıq Komitəsinin AP tərəfdən həmsədri Marina Kalyurand, AP-nin Azərbaycan üzrə daimi məruzəçisi Yelena Zovko və AP-nin Ermənistan üzrə daimi məruzəçisi Andrey Kovaçev tərəfindən Birgə Bəyanat verilib.

Milli Məclisin Mətbuat və ictimaiyyətlə əlaqələr şöbəsindən YAZTV-yə bildirilib ki, bu sənədlə əlaqədar Milli Məclisin deputatı, Avropa İttifaqı-Azərbaycan Parlament Əməkdaşlıq Komitəsinin həmsədri Cavanşir Feyziyev Bəyanatla çıxış edib.

Cavanşir Feyziyev verdiyi Bəyanatda bildirir ki, Azərbaycanda erməni əsirləri ilə pis rəftar edilməsi ilə bağlı “Human Rights Watch” (HRW) təşkilatının əsassız iddialarını özündə əks etdirən birgə sənəd AP (Avropa Parlamenti) üzvlərinin real vəziyyətlə tanış olmaq əvəzinə bəzi təsisatların qərəzli mövqeyini səsləndirməyə üstünlük verdiklərini nümayiş etdirir. Bu kimi əsassız bəyanatla çıxış etmədən öncə AP məruzəçilərinin mövcud əməkdaşlıq platformalarından istifadə etməklə sözügedən iddialarla bağlı Azərbaycanlı həmkarlarından məlumat əldə etmələri daha məntiqli olardı:

"Birgə Bəyanatı imzalamış AP üzvlərinin diqqətinə çatdırırıq ki, Azərbaycanda saxlanılan bütün erməni hərbi əsirlər və mülki şəxslərlə 1949-cu il Cenevrə Konvensiyalarının tələblərinə uyğun rəftar edilib. Onlara lazımi tibbi yardım göstərilib və saxlanıldıqları müddətdə tibbi müayinədən keçiriliblər. Beynəlxalq Qırmızı Xaç Komitəsinin nümayəndələri 2020-ci ilin oktyabrından etibarən bütün erməni əsirlərə müntəzəm olaraq baş çəkib və nəhayət, bütün hərbi əsirlər 10 noyabr 2020-ci il tarixli Üçtərəfli Bəyanatın müvafiq müddəasına uyğun olaraq Ermənistana qaytarılıblar.

Üçtərəfli Bəyanatın imzalanmasından sonra Ermənistan tərəfindən təxribat və terror fəaliyyəti ilə məşğul olmaq məqsədi ilə Azərbaycan ərazisinə göndərilən və Azərbaycan tərəfindən saxlanılan erməni sabotaj qrupunun üzvləri isə hərbi əsirlər hesab oluna bilməz və onlar Azərbaycan Respublikasının Cinayət məcəlləsinə görə məsuliyyət daşıyırlar. Saxlanılan bu şəxslərlə də beynəlxalq insan haqları və Azərbaycan qanunvericiliyinə uyğun şəkildə davranılır.

Birgə Bəyanatda Azərbaycanın Avropa İnsan Hüquqları Məhkəməsinin aralıq tədbirləri üzrə öhdəlikləri çərçivəsində müvafiq addımlar atmaması barədə yer alan iddianı da əsassız hesab edirik".

Cavanşir Feyziyev təəssüflə qeyd edib ki, Bəyanat müəllifləri məsələnin təfərrüatlarını tam araşdırmadan belə bir iddia səsləndiriblər. Belə ki, Azərbaycan öz öhdəliklərinə sadiq olaraq, vətəndaşlarımıza qarşı güc istifadə etməkdə və terror əməlləri həyata keçirməkdə ittiham olunan şəxslərin saxlanma vəziyyəti və sağlamlığı haqqında müvafiq məlumatları aralıq tədbirlər mexanizmi çərçivəsində AİHM-nə təqdim edib.

Beynəlxalq humanitar hüquqa riayət olunması mövqeyindən çıxış etdiklərini iddia edən və HRW təşkilatının qərəzli və əsassız arqumentlərə əsaslanan “hesabatı”na istinad edərək Azərbaycana qarşı əsassız ittihamlarla çıxış edən AP üzvlərinin diqqətinə çatdırmaq istərdik ki, hələ birinci Qarabağ müharibəsi zamanı 4 000-dək azərbaycanlı döyüş bölgələrində itkin düşüb. Lakin bu günədək nə Avropa Parlamenti, nə də digər Avropa qurumları erməni əsirliyində saxlanan Azərbaycanlıların taleyi ilə maraqlanıblar:

"Təəssüf edirik ki, 30 ilə yaxın erməni işğalı altında qalmış Azərbaycan ərazilərinin geniş miqyasda minalanması və torpaqların işğaldan azad edilməsindən sonra Ermənistanın hələ də mina xəritələrini Azərbaycana verməkdən imtina etməsi də AP məruzəçilərini narahat etmir. AP məruzəçilərinin diqqətinə çatdırmaq istərdik ki, Üçtərəfli Bəyanata əsasən hərbi əməliyyatlara son verildiyi vaxtdan bu günədək azad olunmuş ərazilərdə mina partlayışları 20 insanın həyatına son qoyub, 80 nəfər isə ciddi xəsarət alıb".

Milli Məclisin deputatı, Avropa İttifaqı-Azərbaycan Parlament Əməkdaşlıq Komitəsinin həmsədri Cavanşir Feyziyev Bəyanatında bildirib ki, müharibədən sonrakı təmaslarımız zamanı AP-də təmsil olunan həmkarlarımız real vəziyyətlə yerində tanış olmaq üçün dəfələrlə Azərbaycana dəvət olunublar. Buna baxmayaraq AP üzvlərinin regiona səfər etmədən, həqiqətləri öyrənmədən və erməni mənbələrindən qidalanan saxta məlumatlara əsaslanaraq qərəzli mövqe sərgiləməsi təəssüf doğurur və Azərbaycan cəmiyyətində Avropa Parlamentinə olan etimadı sarsıdır.

Ramiz Mehdiyevin səhhətində problem var? – AÇIQLAMA

Ramiz Mehdiyevin səhhətində problem var? – AÇIQLAMA

“19-20 mart tarixlərində bəzi saytlarda AMEA prezidenti, akademik Ramiz Mehdiyevin səhhətində guya ciddi problemlərin yarandığına, vəziyyətinin pisləşdiyinə dair həqiqətə uyğun olmayan xəbər yayılıb”.

YAZTV xəbər verir ki, bu açıqlama ilə AMEA-nın Mətbuat xidməti çıxış edib.

“İctimaiyyətin diqqətinə çatdırırıq ki, yayılan bu informasiyanın heç bir əsası yoxdur, akademik Ramiz Mehdiyev özünü kifayət qədər yaxşı hiss edir.
Mətbuat sahəsində çalışan həmkarlarımızı jurnalist etikasının qaydalarına riayət etməyə çağırır, cəmiyyəti yalan məlumatlarla çaşdırmamağı xahiş edirik.

Həmçinin, xatırlatmaq istəyirik ki, saxta məlumatları tirajlayanlar peşəkar olmadıqlarını nümayiş etdirir, insanlarda özləri haqqında qeyri-ciddi təəssürat yaradırlar”, - deyə açıqlamada qeyd olunub. (medicina az)

Prezident İlham Əliyevin rəsmi "Facebook" səhifəsində Novruz Bayramı münasibətilə paylaşım edilib (FOTO)

Prezident İlham Əliyevin rəsmi "Facebook" səhifəsində Novruz Bayramı münasibətilə paylaşım edilib (FOTO)

Prezident İlham Əliyevin rəsmi "Facebook" səhifəsində Novruz Bayramı münasibətilə paylaşım edilib.

YAZTV paylaşımı təqdim edir:

Nəqliyyat infrastrukturunun inşası Cənubi Qafqazda iqtisadi inkişafa müsbət təsir göstərəcək - XİN rəhbəri

Nəqliyyat infrastrukturunun inşası Cənubi Qafqazda iqtisadi inkişafa müsbət təsir göstərəcək - XİN rəhbəri

Nəqliyyat infrastrukturunun inşası Cənubi Qafqazda iqtisadi inkişafa müsbət təsir göstərəcək.

YAZTV-nin məlumatına görə, bunu İtaliyanın "Agenzia Nova" agentliyinə müsahibəsi zamanı Azərbaycanın xarici işlər naziri Ceyhun Bayramov deyib.

Nazir qeyd edib ki, Dağlıq Qarabağ münaqişəsinin Azərbaycanın ərazi bütövlüyünün beynəlxalq hüquq əsasında bərpa etilməsi ilə başa çatması 1990-cı illərin əvvəllərində etnik təmizləmə nəticəsində Ermənistan silahlı qüvvələri tərəfindən öz torpaqlarından qovulmuş yüz minlərlə azərbaycanlı qaçqının öz evlərinə qayıtmağına imkan verəcək:

"Biz postmünaqişə reabilitasiyası və dinc formada birgə yaşayışın bərpasında yeni bir səhifə açırıq. Burada əsas məsələ Ermənistan və Azərbaycan arasındakı razılaşmaların 10 noyabr 2020-ci il tarixli üçtərəfli bəyanata uyğun olaraq düzgün bir şəkildə həyata keçirilməsidir. Bu, bölgədə davamlı sülh, təhlükəsizlik, sabitlik və rifahın yeganə yoludur. Bununla əlaqədar İtaliyaya hökumət və parlament səviyyəsində 10 noyabr tarixli bəyanata verdiyi dəstəyə görə minnətdarlığımı bildirmək istəyirəm".

Sülhməramlıların Qarabağ regionunda rolu haqqında danışan Ceyhun Bayramov bildirib: "Rusiya sülhməramlıları 10 noyabr 2020-ci il tarixli Azərbaycan, Rusiya Prezidentləri və Ermənistan Baş naziri tərəfindən imzalanmış üçtərəfli bəyanata əsasən, postmünaqişə zonasında yerləşdiriliblər".

Nazir əlavə edib ki, 2020-ci il noyabr ayının sonunda Ermənistandan Azərbaycan ərazisinə təxribat qrupunun girməsi istisna olmaqla, bu günə qədər bəyanatla bağlı heç bir ciddi pozuntu olmayıb:

"Digər bir təhlükəsizlik təhdidi isə Azərbaycanın işğaldan azad edilmiş ərazilərinin minalar və partlamamış hərbi sursatlarla sıx şəkildə minalanmasıdır. Bu günə qədər Ermənistan minalanmış ərazilərin xəritələrini verməkdən imtina edir, bu isə beynəlxalq humanitar hüququn açıq şəkildə pozulmasıdır və çoxsaylı insan tələfatına səbəb olur".

Nazir əlavə edib ki, nəqliyyat infrastrukturunun yaradılması Cənubi Qafqazda müsbət iqtisadi inkişafa səbəb ola bilər:

"Yeni nəqliyyat xətti Azərbaycanı təxminən 30 ildir Ermənistan tərəfindən mühasirəyə alınan Naxçıvanla birləşdirəcəkdir. Bu, həmçinin Cənubi Qafqaz ölkələri və qonşuları arasında əlaqəni yaxşılaşdıracaqdır. Yeni nəqliyyat landşaftı iqtisadi əməkdaşlığa və inkişafa kömək edəcək, bu da regional və beynəlxalq miqyasda müsbət təsiri təmin edəcək".

C.Bayramov bu yaxınlarda İtaliyanın "Ansaldo" şirkəti ilə azad edilmiş ərazilərdə elektrik enerjisi təchizatı üzər vacib razılaşmanın imzalandığını nəzərə alaraq bu müddətdə İtaliya şirkətləri üçün gələcək imkanları da qeyd edib.

Nazirin sözlərinə görə, indi Azərbaycan Vətən müharibəsindən sonra postmünaqişə dövrünə qədəm qoyub və azad edilmiş ərazilərdə yenidənqurma işlərinə başlayıb: "Qlobal iqtisadiyyat ressisiya yaşadığından, Azərbaycanın başlatdığı genişmiqyaslı yenidənqurma layihələri böyüməyə təkan verə və bərpanı yaxşılaşdırmaq üçün əlavə imkanlar yarada bilər"

C.Bayramov əlavə edib ki, bu kontekstdə minaların təmizlənməsi prioritetdir: "Nəqliyyat, rabitə, enerji, mədəniyyət və tarixi abidələrin bərpası sahəsində genişmiqyaslı işlər nəzərdə tutulub. İtaliya şirkətləri bu sahələrdə geniş təcrübəyə malikdirlər. İtaliya hökuməti və şirkətləri yenidənqurma və bərpa işlərində iştirak etməkdə maraqlı olduqlarını artıq açıqlayıblar. Mümkün əməkdaşlıq sahələri müzakirə olunur".

Gürcüstanın baş naziri azərbaycanlılarla görüşüb

Gürcüstanın baş naziri azərbaycanlılarla görüşüb

Gürcüstanın baş naziri İrakli Qaribaşvili Novruz bayramı münasibətilə hökumət adminstrasiyasında azərbaycanlı həmvətənləri ilə görüşüb.

YAZTV xəbər verir ki, görüşdə barışıq və vətəndaş bərabərliyi üzrə dövlət naziri Tea Axvlediani, Kvemo Kartli bölgəsinin qubernatoru Şota Rexviaşvili, deputatlar Zaur Darğallı və Savalan Mirzəyev də iştirak edib.

Hökumət başçısı azərbaycanlıları bayram münasibətilə şəxsən təbrik etməsindən böyük şərəf duyduğunu deyib: “Pandemiya səbəbindən bayramı başqa formatda qeyd etmək məcburiyyətində qaldıq. Xatirimdədir, ilk dəfə baş nazir olanda şəxsən Marneuliyə səfər etmişdim və bayramı birgə keçirmişdik. Təəssüflər olsun ki, pandemiyaya görə fərqli vəziyyət yaranıb. Buna görə də hamıya bu reallığı nəzərə aldıqlarına görə təşəkkür edirəm. Bir daha səmimi qəlbdən Novruz bayramınızı təbrik edirəm”.

T.Axvlediani də Novruz bayramı münasibətilə azərbaycanlıları təbrik edib, onlara tərəqqi, əmin-amanlıq və möhkəm cansağlığı diləyib. (report az)

Müdafiə Nazirliyi Vətən müharibəsində düşmənin döyüş texnikası və canlı qüvvəsinin məhv edilməsini əks etdirən videogörüntüləri yayıb

Müdafiə Nazirliyi Vətən müharibəsində düşmənin döyüş texnikası və canlı qüvvəsinin məhv edilməsini əks etdirən videogörüntüləri yayıb

YAZTV Vətən müharibəsi zamanı Azərbaycan Ordusunun raket-artilleriya və tank əleyhinə bölmələri tərəfindən düşmənin döyüş texnikası və canlı qüvvəsinin dəqiq atəş zərbələri ilə məhv edilməsini əks etdirən videogörüntüləri təqdim edir:

https://www.youtube.com/watch?v=KqwJA0KTD7A

XİN “Human Rights Watch"un hərbi əsirlərlə bağlı iddialarına cavab verib

XİN “Human Rights Watch"un hərbi əsirlərlə bağlı iddialarına cavab verib

Azərbaycan beynəlxalq humanitar hüquq və insan haqqları hüququ daxil olmaqla, beynəlxalq normalara riayət olunmasına sadiqdir. Biz “Human Rights Watch” (HRW) təşkilatının hərbi əsirlərlə Cenevrə Konvensiyalarına uyğun rəftar olunmaması ilə bağlı iddialarını rədd edirik.

YAZTV-nin məlumatına görə, bu barədə Azərbaycan Respublikası Xarici İşlər Nazirliyinin Mətbuat xidməti idarəsinin “Human Rights Watch” təşkilatının məruzəsində erməni əsirləri ilə pis rəftar halları barədə iddialara dair şərhində deyilir:

XİN bildirir: "Təəssüf edirik ki, HRW tərəfindən erməni əsirlərinə qarşı pis rəftar hallarının olduğunu iddia edən son hesabat birtərəfli xarakter daşıyır, obyektiv vəziyyəti əks etdirmir. Əsassız dəlillərə və yoxlanılmayan faktlara əsaslanan bu cür hesabatların sistematik olması onların etibarlılığını şübhə altına alır.

Azərbaycanda saxlanılan bütün erməni hərbi əsirlər və mülki şəxslərlə 1949-cu il Cenevrə Konvensiyalarının tələblərinə uyğun olaraq rəftar edilib. Onlar işgəncə, alçaldıcı və pis rəftara məruz qalmayıblar, olanlara lazımi tibbi yardım göstərilib və hər biri saxlanıldıqları müddətdə tibbi müayinədən keçirilib. Müayinə zamanı xəsarət izləri aşkar olunmayıb (döyüş əməliyyatlarında alınan zədələr istisna olmaqla).

Azərbaycanda hərbi əsirlərin olması iddialarına gəldikdə isə vurğulamaq istərdik ki, Azərbaycan bütün hərbi əsirləri Ermənistana qaytarıb. Bu, 10 noyabr 2020-ci il üçtərəfli bəyanatı ilə razılaşdırılıb.

2020-ci ilin oktyabr ayından etibarən erməni hərbi əsir və mülki şəxslərə Beynəlxalq Qırmızı Xaç Komitəsinin nümayəndələri tərəfindən müntəzəm baş çəkilib və ailə üzvləri ilə telefon və video danışıqlarına icazə verilib.

Əlavə olaraq, Azərbaycan Respublikası Ombudsman Aparatının nümayəndələri

hərbi əsirlərin və mülki şəxslərin saxlandıqları yerləri ziyarət edərək onların şəraiti ilə tanış olublar.

Azərbaycanda sui-istifadə halları ilə əlaqəli olduğu iddia edilən şəxslərə qarşı cinayət işləri açılıb. Xatırladaq ki, dəfələrlə edilən müraciətlərə və çoxsaylı iddialara baxmayaraq, Ermənistan azərbaycanlı əsirlərə və həbsdə saxlanılan mülki şəxslərə qarşı alçaldıcı rəftar halları ilə bağlı hər hansı bir araşdırmaya başlamayıb.

Ermənistan hökuməti, həbslərin edildiyi konteksti qarışdırmağa çalışır. Qarşıdurmanın bitməsini ehtiva edən 10 Noyabr 2020-ci il tarixli üçtərəfli bəyanatın imzalanmasından sonra Azərbaycanda saxlanılan şəxslər hərbi əsir hesab edilmirlər. Sözügedən üçtərəfli bəyanatın imzalanmasından sonrakı dövrdə Ermənistan tərəfindən təxribat və terror fəaliyyəti ilə məşğul olmaq məqsədi ilə Azərbaycan ərazisinə göndərilənlər beynəlxalq humanitar hüquqa uyğun olaraq hərbi əsir deyillər və hesab edilə bilməzlər. Saxlanılanlar Azərbaycan Respublikasının cinayət məcəlləsinə görə məsuliyyət daşıyırlar. Saxlanılanlarla beynəlxalq insan hüquqları hüququ və Azərbaycan qanunvericiliyinə uyğun şəkildə davranılır.

Bir daha vurğulayırıq ki, Azərbaycan hərbi əsir kimi təsnif edilən bütün məhbusları geri qaytarıb.

Azərbaycan hökuməti, HRW təşkilatını diqqətini Ermənistan tərəfindən azərbaycanlı hərbi əsirlərə və mülki məhbuslara, habelə itkin düşən minlərlə azərbaycanlına qarşı pis rəftar faktlarına yönəltməyə çağırır.

Birinci Qarabağ müharibəsi nəticəsində 3890 azərbaycanlı itkin düşüb və onların taleyi hələ də məlum deyil. İtkin düşənlərin 3171-i hərbçi, 719 mülki şəxsdir (o cümlədən 71 uşaq, 267 qadın, 326 yaşlı).1480 keçmiş Azərbaycan əsirinin şahid ifadələrinə görə, 1949-cu il Cenevrə Konvensiyaları da daxil olmaqla, beynəlxalq humanitar hüququn kobud şəkildə pozulması ilə Azərbaycan əsirləri işgəncə görüb, onlara qarşı pis rəftar edilib və onlar alçaldıcı şəraitdə saxlanılıb. Azərbaycan əsirləri və saxlanılan şəxslərə qarşı alçaldıcı rəftar və işgəncə etdiyi sübuta yetirilən 35 nəfər barəsində cinayət işi açılıb. Məsuliyyət daşıyan şəxslərin adları İnterpola təqdim edilib.

Son hərbi əməliyyatlar zamanı Ermənistan silahlı qüvvələri tərəfindən Azərbaycan əsirlərinə qarşı pis rəftarı göstərən və sosial mediada geniş yayılmış video materiallar da daxil olmaqla çoxsaylı dəlillər var.

Əvvəllər Ermənistanda saxlanılan və daha sonra Azərbaycana qaytarılan bütün əsir və mülki şəxslər məhkəmə tibbi ekspertizasından keçirilib və saxlanma şəraitləri barədə sorğu ediliblər. Mütəxəssis rəyləri, şəxsi ifadələr və digər materiallar məhbusların böyük əksəriyyətinin fiziki işgəncə və qeyri-insani rəftara məruz qaldıqlarını təsdiqləyib.

Qeyd etmək istərdik ki, Azərbaycandan fərqli olaraq, Ermənistan hökuməti bu iddiaları araşdırmaqdan imtina edib.

Biz müvafiq beynəlxalq institutları qərəzli mövqedən çəkinməyə və bölgədəki münaqişədən sonrakı vəziyyətlə bağlı hesabatlar tərtib edərkən tam qərəzsizliyi və peşəkar münasibəti təmin etməyə çağırırıq".

Yaponiya səfiri Azərbaycan xalqını təbrik edib

Yaponiya səfiri Azərbaycan xalqını təbrik edib

Yaponiya səfiri Vada Cüniçi Azərbaycan xalqını Novruz bayramı münasibətilə təbrik edib.

YAZTV xəbər verir ki, Yaponiya səfiri Vada Cüniçinin təbrik mesajında deyilir:

“Novruz bayramınız mübarək!

“Yeni gün” özü ilə yeni ümidlər, yeni arzular gətirir. Baharın gəlişi, təbiətin oyanması kimi gözəl prosesin Azərbaycan da daxil olmaqla, bir çox ölkələrdə təntənəli şəkildə qeyd olunması və hətta Novruzun UNESKO-nun Qeyri-maddi irs üzrə Reprezentativ siyahısına daxil edilməsi çox sevindirici haldır. Bu gün, yəni 21 mart tarixi Yaponiyada da yazın gəlişi ilə gecə və gündüzün bərabərliyi kimi qeyd olunur. Biz yaponlar da yazı çox sevir, gözəl sakura çiçəklərinin mənzərəsini, yeni həyatın başlanğıcını böyük sevinc hissi ilə qarşılayırıq.

Bu bahardan və Novruzdan arzum, hər birinizin evinə ruzi-bərəkət, hər iki ölkə üçün yeni uğurlu başlanğıclar, sülh və əmin-amanlıq gətirməsidir!”

 

Əziz izləyicilərimiz, Səfir Vada Cüniçinin sizə təbrik mesajı var: 🌱“Novruz bayramınız mübarək! Novruz; “yeni gün”...

Posted by Yaponiyanın Azərbaycan Respublikasındakı Səfirliyi 在アゼルバイジャン日本国大使館 on 20 Mart 2021, Şənbə
Əli Əsədovun Qazaxıstanın baş naziri ilə telefon danışığı olub

Əli Əsədovun Qazaxıstanın baş naziri ilə telefon danışığı olub

Qazaxıstan tərəfinin təşəbbüsü ilə Azərbaycan Respublikasının Baş naziri Əli Əsədov ilə Baş nazir Askar Mamin arasında telefon danışığı olub.

Nazirlikdən verilən məlumata görə, söhbət zamanı Askar Mamin öz həmkarını Novruz bayramı münasibətilə təbrik edib, Qazaxıstan və Azərbaycan xalqlarının uzunəsrlik dostluğunun möhkəm təməllərə söykəndiyini deyib. Azərbaycanın uğurları xüsusi vurğulanıb.

Telefon danışığında Azərbaycan ilə Qazaxıstan arasında münasibətlərin iqtisadi və ticarət aspektlərinə dair bir sıra məsələlər müzakirə olunub.