Friday, 20 May 2022 09:20
Yeni Azərbaycan Televiziyası
Bakı
İstanbul
Moskva
Dünyanın bir nömrəli tennisçisi karyerasını başa vurub

Dünyanın bir nömrəli tennisçisi karyerasını başa vurub

Böyük Dəbilqə turnirinin üçqat qalibi, dünyanın bir nömrəli qadın tennisçisi Eşli Barti 25 yaşında peşəkar karyerasını başa vurub.

YAZTV-nin məlumatına görə, avstraliyalı idmançı bu barədə Qadın Tennis Assosiasiyasının rəsmi saytına açıqlama verib.

O bildirib ki, artıq başqa məqsədlərə çatmağa çalışmağın vaxtıdır: "Kiçik yaşlarımdan tennis oynayıram. Artıq 18 yaşım olanda uzun fasilə vermişdim. Həmin vaxt, sadəcə, normal yeniyetmə həyatı yaşamaq və bundan həzz almaq istəyirdim. Tennis bütün arzularımı və hətta daha çoxunu həyata keçirdi. Düşünürəm ki, artıq raketkaları atmaq zamanı çatıb".

Qeyd edək ki, Eşli Barti 2019-cu ildə "Rolan Qarros" (Fransanın Açıq çempionatı), 2021-ci ildə Uimbldon, bu il isə Avstrliya Açıq Çempionatının qalibi olub.

UEFA oyunlarının Rusiyada nümayişi qadağan oluna bilər

UEFA oyunlarının Rusiyada nümayişi qadağan oluna bilər

UEFA öz bayrağı altındakı növbəti qarşılaşmaların Rusiyada nümayişini qadağan etmək niyyətindədir.

YAZTV xəbər verir ki, Avropa futbol qurumu Rusiya yayımçısı ilə müqavilənin pozulmasının mümkünlüyünü nəzərdən keçirir. İlk olaraq, bu həftə keçiriləcək matçların, o cümlədən, İngiltərə millisinin İsveçrə və Kot d İvuarla yoldaşlıq görüşlərinin yayımına qadağa qoyulması müzakirə edilir.

Mümkün məhdudiyyətlər dünya çempionatının pley-off oyunlarına şamil olunmayacaq. Çünki həmin görüşləri FIFA təşkil edir.

Rusiyada UEFA bayrağı altında qarşılaşmaların yayım hüququ "Matç TV"yə məxsusdur.

Qeyd edək ki, daha əvvəl İngiltərə Futbol Assosiasiyası (FA) ölkə kubokunun 1/4 final görüşünün Rusiyada göstərilməsindən narazı qalıb. FA yayım müqaviləsini dayandırmağı xahiş etsə də, sonradan oyunlar nümayiş etdirilib.

İtaliyalı velosipedçi finişə çatdıqdan sonra infarkt keçirib

İtaliyalı velosipedçi finişə çatdıqdan sonra infarkt keçirib

"Bəhreyn Viktorius" komandasının velosipedçisi Sonni Kolbrelli "Vuelta Kataloniya" yarışının birinci mərhələsində xoşagəlməz hadisə ilə üzləşib.

YAZTV "Velonews"a istinadən xəbər verir ki, 172 km-lik məsafədə finişə 2-ci çatan italiyalı idmançının qəflətən halı pisləşib. Huşunu itirən velosipedçidə əvvəlcə qıcolmalar baş verib.

İlkin tibbi müdaxilədən sonra Kolbrellinin infarkt keçirdiyi bəlli olub. Defibrillyator cihazının köməyi ilə özünə gələn idmançı yerli xəstəxanaya yerləşdirilib.

Hadisə şahidlərinin sözlərinə görə, Kolbrelli finişə çatandan sonra komandadakı tərəfdaşlarından və ya rəqiblərindən birinə salam vermək niyyətində olub. Lakin o, qəfildən huşunu itirərək yerə yıxılıb.

Azərbaycan millisinin futbolçusu Almaniya klubundan ayrıla bilər

Azərbaycan millisinin futbolçusu Almaniya klubundan ayrıla bilər

Azərbaycan millisinin futbolçusu Dmitri Nazarov Almaniyanın "Ertsgebirge" klubundan ayrıla bilər.

YAZTV-nin məlumatına görə, bu barədə Aue təmsilçisinin prezidenti Helge Leonhardt açıqlama verib.

II Bundesliqada çıxış edən komanda 26 oyundan sonra 19 xalla 17-ci pillədə qərarlaşıb və aşağı dəstəyə düşməyə əsas namizədlərdən biridir. Bunu nəzərə alan klub rəhbərliyi heyətlə bağlı dəyişikliklərə hazırlaşır.

Leonhardtın sözlərinə görə, Nazarovla yanaşı, Klemens Fandrix, Syoren Qonter və Yan Hoxşaydtın da məsələləri açıq olaraq qalır: "Hər şeyi çox diqqətlə və kollektiv şəkildə dəyərləndirməliyik. Bura idman nəticələrinin qiymətləndirilməsi ilə yanaşı, ödəniş imkanı da daxildir".

Qeyd edək ki, Dmitri Nazarov 3 illik fasilədən sonra Azərbaycan millisinə dəvət alıb.

Navalnıy 9 il müddətinə həbs edildi

Navalnıy 9 il müddətinə həbs edildi

Moskvanın Lefortovo Rayon Məhkəməsi hazırda həbsdə olan rusiyalı müxəlifətçi Aleksey Navalnıyı dələduzluq və məhkəməni təhqir etməkdə təqsirli bilib.

Bu barədə YAZTV Rusiya mətbuatına istinadən xəbər verir.

 Dövlət ittihamçısı məhkəmədən mühakimə olunan bloqer Navalnıyın təqsirli bilinməsini və onun 13 il müddətinə ciddi rejimli koloniyada cəza çəkməsini və 1,2 milyon rubl (hakimi təhqir etdiyinə görə) cərimələnməsini istəyib.

Navalnıy özünü təqsirli bilməyib. 

Məhkəmə rusiyalı müxalifətçini 9 il müddətinə azadlıqdan məhrum edib. O, cəzasını ciddi rejimli koloniyada çəkəcək. Navalnıy, həmçinin 1,2 milyon rubl məbləğində cərimə ödəməli olacaq. 

Daha əvvəl məhkəmədən “RİA Novosti”yə bildirilmişdi ki, dələduzluqla bağlı cinayət işi bir il əvvəl başladılıb. İstintaqın məlumatına görə, Navalnıy Korrupsiya ilə Mübarizə Fonduna ianə edilən pulun bir hissəsini oğurlayıb və şəxsi ehtiyacları üçün sərf edib.

Sözügedən işin ikinci epizodu isə bloqerə Böyük Vətən müharibəsi veteranı İqnat Artemenkoya böhtan atdığına görə hökm oxuyan hakim Vera Akimovanın təhqir edilməsi ilə bağlıdır – prosesin nəticəsində Navalnıy 850 min rubl məbləğində cərimə olunub.

Qeyd edək ki, ötən il fevralın 2-də Federal Penitensiar Xidmətin tələbi ilə “İv Roşe” işi üzrə müxalifət lideri Aleksey Navalnıyın şərti cəzası ləğv edilərək 3,5 il müddətinə azadlıqdan məhrumetmə cəzası ilə əvəzlənib. Hazırda o, Vladimir vilayətinin Pokrov şəhərindəki 2 saylı islah koloniyasında cəza çəkir.

Azərbaycan Premyer Liqası dünya reytinqinin ilk "3-lüy"ünə düşüb

Azərbaycan Premyer Liqası dünya reytinqinin ilk "3-lüy"ünə düşüb

Beynəlxalq İdman Araşdırmalar Mərkəzi (CIES) baş məşqçilərin orta iş müddətinə görə dünyanın ən yaxşı 90 liqasının siyahısını açıqlayıb.

YAZTV CIES-in rəsmi saytına istinadən xəbər verir ki, Azərbaycan Premyer Liqası 1 069 günlük göstərici ilə üçüncü pillədə qərarlaşıb. Ölkə çempionatı UEFA sıralamasında da eyni mövqedə yer alıb.

Birinci pilləni Şimali İrlandiya Premyer Liqası (1 563 gün), ikinci sıranı isə Uels Premyer Liqası (1 348) tutur.

Ən çox baş məşqçi istefasının gerçəkləşdiyi ölkələrdən biri Türkiyədir. Bu səbəbdən Superliqa 217 günlük göstərici ilə dünya reytinqində 80-ci, Avropada isə 46-cı yerdə qərarlaşıb.

Azərbaycanlı idmançıya ağır cəza: Olimpiya medalı əlindən alınıb

Azərbaycanlı idmançıya ağır cəza: Olimpiya medalı əlindən alınıb

Dopinq-test üçün verdiyi sidik analizini dəyişdirməkdə şübhəli bilinən azərbaycanlı ağırlıqqaldıran Nicat Rəhimov sərt cəzalandırılıb.

YAZTV "Matc TV"yə istinadən xəbər verir ki, 29 yaşlı idmançı 8 il müddətinə diskvalifikasiya olunub. O, həmçinin olimpiya medalından məhrum edilib.

Beynəlxalq Dopinq Test-Agentliyi (ITA) 2021-ci ilin yanvarında Rəhimova qarşı antidopinq qaydalarının pozuntusu ilə bağlı ittiham irəli sürüb və idmançını yarışdan kənarlaşdırıb.

Qərardan narazı qalan ağırlıqqaldıran CAS-a müraciət edib. O, araşdırma müddətində yarışlardan müvəqqəti uzaqlaşdırılmışdı.

Təcrübəli idmançı 2014-cü ildə Azərbaycan yığmasını tərk edərək, Qazaxıstan vətəndaşlığına keçib. O, növbəti il dünya çempionu, 2016-cı ildə isə Rio-de-Janeyro Yay Olimpiya Oyunlarının qalibi olub.

Qeyd edək ki, Nicat Rəhimov Azərbaycan millisində ikən 2013-cü ildə orqanizmində steroidlər tapıldığı üçün 2 il müddətinə diskvalifikasiyaya məruz qalıb.

Qitə çempionlarının üz-üzə gələcəyi matçın başlama saatı açıqlanıb

Qitə çempionlarının üz-üzə gələcəyi matçın başlama saatı açıqlanıb

Futbol üzrə son Avropa çempionu İtaliya və Amerika Kubokunun son qalibi Argentina yığmaları arasında keçiriləcək oyunun başlama saatı açıqlanıb.

YAZTV-nin UEFA-nın rəsmi saytına istinadən məlumatına görə, "Finalissima" adı verilən və iyunun 1-də oynanılacaq qarşılaşma Bakı vaxtı ilə saat 22:45-də start götürəcək.

Londonda 86 000 tamaşaçı tutumuna malik "Uembli" stadionunda gerçəkləşəcək görüşün biletləri martın 24-də satışa çıxarılacaq.

Qeyd edək ki, bu oyun Avropa futbol qurumu ilə Cənubi Amerika Futbol Konfederasiyası (CONMEBOL) arasında imzalanmış əməkdaşlıq memorandumu çərçivəsində baş tutacaq.

"Zirə" "Qəbələ" ilə qarşılaşacaq

"Zirə" "Qəbələ" ilə qarşılaşacaq

"Zirə" milli komandaların oyunları ilə əlaqədar çempionatda yaranan fasilədə yoxlama oyunu keçirəcək.

YAZTV xəbər verir ki, bu barədə klubun mətbuat xidməti məlumat yayıb.

 Komanda martın 27-də "Qəbələ" ilə qarşılaşacaq. Zirə İdman Kompleksində keçiriləcək görüş saat 17:00-da başlayacaq.

Qeyd edək ki, "Zirə" hazırda Premyer Liqada 35 xalla 3-cü, "Qəbələ" isə 33 xalla 4-cü pillədə qərarlaşıb. (qol az)

“Bir daha mənim kimi futbolçu olmayacaq”

“Bir daha mənim kimi futbolçu olmayacaq”

“Milan”ın 40 yaşlı futbolçusu Zlatan İbrahimoviç bu il karyerasını başa vurmağı düşünmür.

YAZTV” xəbər verir ki, o, bu haqda jurnalistlərə açıqlamasında deyib.

“Karyeramı başa vurmaq barədə düşünəndə bir az qorxu hissi keçirirəm. Yaxşı nəticələr qazandığım və zədəyə görə ağrımadığım müddətdə oynamağa davam etmək istəyirəm. Karyeramı peşmanlıq duymadan bitirməliyəm. Ona görə də zamanı ən yüksək səviyyədə dəyərləndirməliyəm. Bu, 20-25 ilmi sürər, bilmirəm. Amma bir gün oyanacam və artıq heç bir planımın olmadığını görəcəm. O zaman isə ən çox siz üzüləcəksiniz. Məni futbolçu kimi görməyəcəksiniz. Bunun dadını çıxarın. Çünki bir daha mənim kimi futbolçu olmayacaq” - İbrahimoviç bildirib.

Təcrübəli oyunçu bu mövsüm “Milan”ın heyətində 18 oyunda meydana çıxıb, 8 qol vurub. O, Çexiya ilə DÇ-2022-nin matçı üçün 5 illik fasilədən sonra İsveç millisinə dəvət alıb.

Kamran Ağayev milli komandanın məşqçisi təyin olunub

Kamran Ağayev milli komandanın məşqçisi təyin olunub

Azərbaycan yığmasının sabiq qapıçısı Kamran Ağayev əsas millidə işə başlayıb.

YAZTV-nin məlumatına görə, veteran qolkiper baş məşqçi Canni De Byazinin köməkçisi təyin olunub.

Ağayev yığmada qapıçılar üzrə məşqçi funksiyasını yerinə yetirəcək.

Qeyd edək ki, Kamran Ağayev 2008 - 2018-ci illərdə Azərbaycan millisinin formasını geyinib. Ağayev bu ilin yanvarında karyerasını başa vurub.

Azərbaycan boksçuları Avropa çempionatında ilkə imza ata bilərlər

Azərbaycan boksçuları Avropa çempionatında ilkə imza ata bilərlər

Xorvatiyanın Poreç şəhərində keçirilən U-22 Avropa çempionatı Azərbaycan boksçuları üçün əlamətdar hadisə ilə yadda qala bilər.

Federasiyadan  verilən məlumata görə, finala vəsiqə qazanmış Nicat Hüseynov (51 kq) və Ruslan Qədirov (54 kq) qələbə qazanacaqları halda, milli komanda qitə turnirində ilk dəfə 2 qızıl medala sahib çıxacaq.

Bu isə Azərbaycan boks tarixinə ilk kimi düşəcək.

Gənc boksçular artıq 2 bürünc medalı rəsmiləşdirib. Böyük məşqçi Nəriman Abdullayevin rəhbərlik etdiyi millinin heyətində Cəlal Qurbanov (63,5) və Nəbi İsgəndərov (67 kq) 3-cü yeri tutublar.

Qeyd edək ki, Avropa çempionatında final qarşılaşmaları martın 23-də olacaq. Həmin gün Nicat Hüseynov gürcüstanlı Lekso Xasaya ilə, Ruslan Qədirov türkiyəli Samet Gümüşlə döyüşəcək.