Thursday, 23 Sentyabr 2021 18:29
Yeni Azərbaycan Televiziyası
Bakı
İstanbul
Moskva
F.Əmirov adına Azərbaycan Dövlət Mahnı və Rəqs Ansamblının üzvləri Nizami Gəncəvi Məqbərəsini ziyarət ediblər

F.Əmirov adına Azərbaycan Dövlət Mahnı və Rəqs Ansamblının üzvləri Nizami Gəncəvi Məqbərəsini ziyarət ediblər

Fikrət Əmirov adına Azərbaycan Dövlət Mahnı və Rəqs Ansamblının üzvləri Nizami Gəncəvi Məqbərəsini ziyarət ediblər. Qonaqlara məlumat verilib ki, Nizami Gəncəvinin qəbri üzərində ilk türbə 14-cü əsrdə tikilib. Bu vaxta qədər şairin məzarı üzərində müxtəlif əsrlərdə 4 dəfə türbə tikilsə də onların heç biri bu qədər möhtəşəm və əzəmətli olmayıb. Ümumi hündürlüyü 24 metr olan hazırki türbənin inşasında ən qiymətli tikinti materiallarından olan qırmızı qranitdən istifadə olunub.

Daha sonra ansamblının solistləri Taleh Yahyayev, Rəvanə Əmiraslanova və Kazım Nicat Fəxri dahi bəstəkar Üzeyir Hacıbəylinin Nizami Gəncəvi sözlərinə yazdığı "Sənsiz" və "Sevgili canan" romanslarını Nizami Gəncəvinin ruhuna hörmət əlaməti olaraq şairin məqbərəsi önündə ifa ediblər.

Qeyd edək ki,cari ilin sentyabr ayının 22-də Heydər Əliyev Fondu, Azərbaycan Respublikasının Mədəniyyət Nazirliyi, Azərbaycan Bəstəkarlar İttifaqı və Bakı Musiqi Akademiyasının təşkilatçılığı ilə XIII Üzeyir Hacıbəyli adına Beynəlxalq Musiqi Festivalının növbəti tədbiri Gəncə şəhərində baş tutub.

GƏNCƏSƏNƏT - incəsənət, sənətkarlıq və yaradıcılıq sərgi-yarmarkasının açılışı olub

GƏNCƏSƏNƏT - incəsənət, sənətkarlıq və yaradıcılıq sərgi-yarmarkasının açılışı olub

Gəncə şəhər İcra Hakimiyyətinin dəstəyi, Gəncə İctimai İştirakçılq Məclisinin təşəbbüsü, Gəncə Regional Mədəniyyət İdarəsi, Gəncə Destinasiya Menecmenti Təşkilatı, Kiçik və Orta Biznesin İnkişafı Agentliyinin birgə təşkilatçılığı, “Sahibkar Qadınlar” İB-in, “Gəncə Maarif Evi” İB-in və “Cavad Xan” Tarix və Mədəniyyət Fondunun təfədaşlığı ilə «GƏNCƏSƏNƏT» - Gəncə incəsənət, sənətkarlıq və yaradıcılıq sərgi-yarmarkası təşkil olunub.


Gəncə Dövlət Filarmoniyasının yaxınlığındaki Urban Mərkəzindən baş tutan açılış mərasimində Gəncə Şəhər İcra Hakimiyyəti başçısının müavini Kamran Məhərrəmov, Millət Vəkilləri Müşfiq Cəfərov və Pərvin Kərimzadə, Türkiyənin Gəncədəki Baş Konsulu Zeki Öztürk, Gəncə Regional Mədəniyyət İdarəsinin rəisi Vasif Cənnətov, Gəncə Destinasiya Menecmenti Təşkilatının direktoru Zaur Bayramov, “Cavad Xan” Tarix və Mədəniyyət Fondunun birinci vitse-prezidenti Müzadil Həsənov və başqaları iştirak ediblər.
Tədbir Azərbaycan Respublikasının dövlət himninin səsləndirilməsi ilə başlayıb. Daha sonra Azərbaycanın müstəqilliyi, suverenliyi və ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib.


Qeyd edilib ki, Gəncə tarixən mədəniyyət beşiyi hesab edilir. Burada hələ qədim dövrlərdən xeyli sayda sənətkarlar fəaliyyət göstərib, müxtəlif sənətkarlıq və incəsənət növləri inkişaf edib. Hazırda Gəncə şəhəri və ümumilikdə Qərb regionunda incəsənət və sənətkarlıq nümunələrinin satış-sərgi məkanının olmaması bu sahəyə olan marağın azalmasına gətirib çıxarıb.


Sərgi-yarmarkanın həyata keçirilməsinin əsas məqsədi vaxtılə Gəncədə, eləcə də ətraf bölgələrdə mövcud olmuş, bugünki dövrə gəlib çatmamış və ya çox az sayda sənətkar tərəfindən qorunub saxlanan bir sıra sənət ənənələrinin dirçəldilməsi və yaşadılmasıdır. Bununla yanaşı sərgi-yarmarka alıcılarla sənətkarlar arasında körpülərin salınmasına, yaradıcılıqla məşğul olanlar arasında inkişaf yönümlü dialoqun qurulmasına, əhalidə sənətkarlıq və incəsənətə olan marağın artıırılmasına, müxtəlif istiqamətli sənət növlərinin yaşadılması və inkişafına eləcə də şəhərin mədəni həyatının canlandırılmasına xidmət edir.


«GƏNCƏSƏNƏT» - incəsənət, sənətkarlıq və yaradıcılıq sərgi-yarmarkasında Gəncə şəhəri və Qərb regionunda yaşayan sənətkarlara, rəssamlara aid bir çox növdə sənətkarlıq və rəngkarlıq nümunələri, həvəskar şəkildə yaradıcılıqla məşğul olan şəxslərin müxtəlif janrlarda əl işləri, həmçinin Gəncə mətbəxinin nümunələri tədqim olunub.
İki gün davam edəcək sərgi-yarmarkanın gələcəkdə mütəmadi şəkildə keçirilməsi planlaşdırılır.

Bu gün Azərbaycanda Milli Musiqi Günüdür

Bu gün Azərbaycanda Milli Musiqi Günüdür

Bu gün Azərbaycanda Milli Musiqi Günüdür.

YAZTV bildirir ki, 1885-ci il sentyabrın 18-də dahi bəstəkar Üzeyir Hacıbəyli dünyaya göz açıb.

Bu tarix ölkəmizdə Milli Musiqi Günü kimi qeyd olunur və 2009-cu ildən başlayaraq Ü.Hacıbəyliyə həsr olunmuş Beynəlxalq Musiqi Festivalı keçirilir.

Builki Milli Musiqi Günü xüsusilə əlamətdar olacaq. Çünki 30 ildən sonra işğaldan azad edilən Azərbaycanın mədəniyyət paytaxtı Şuşada ilk dəfə Beynəlxalq Musiqi Festivalı keçiriləcək. Belə ki, Şuşada Xalq artisti Ağaverdi Paşayevin rəhbərliyi altında F.Əmirov adına Azərbaycan Dövlət Mahnı və Rəqs Ansamblı, eləcə də tanınmış solistlərin iştirakı ilə açıq havada konsert təşkil olunacaq.

Qeyd edək ki, Heydər Əliyev Fondunun və Mədəniyyət Nazirliyinin təşkilatçılığı ilə təşkil olunan bu festival hər il sentyabrın bu günündə açıq elan edilir və 10 gün davam edir.

Builki festivalda ABŞ, Rusiya, Çin, Türkiyə, İtaliya, Özbəkistan, Belarus, Bolqarıstan, Ukrayna, Gürcüstandan tanınmış musiqiçi və kollektivlərin iştirakı nəzərdə tutulub.

Onlar arasında Türkiyənin Çukurova Dövlət Simfonik Orkestri, Çin Xalq Respublikasının “Silk Road” Filarmonik Orkestri, Sergey Roldugin, Xatia Buniatişvili, Alyona Bayeva, Miroslav Kultışev, Sergey Doqadin, Filip Kopaçevski, Veliçka Yoçeva, Yevgeni Avramenko, Lorenzo Tazzieri, Dmitri Xoxlov, Aleksandr Hacıyev, Marqarita Aleksandroviç, Murat Səlim Tokac, Regina Rüstəmova, Cəbrayıl İdrisov, Giorgi Çelidze, Ümid İsrailov, habelə Azərbaycan sənətçiləri Rauf Abdullayev, Ülviyyə Hacıbəyova, Yeganə Axundova, Fəxrəddin Kərimov, Murad Adıgözəlzadə, Murad Hüseynov, Əyyub Quliyev, Mustafa Mehmandarov və başqaları var. Festival çərçivəsində 40-a yaxın tədbirin keçirilməsi planlaşdırılır.

Üzeyir Hacıbəyli bəstəkar, alim, yazıçı, publisist, ictimai və siyasi xadim kimi çoxşaxəli fəaliyyəti ilə yanaşı, Şərqdə ilk operanın banisi kimi tanınan sənətkardır. Məhz onun fədakar əməyi sayəsində Azərbaycan milli opera sənətinin tarixi 110 il bundan öncə tamaşaya qoyulan “Leyli və Məcnun” operası ilə başlanıb. Operanın ilk dirijoru Əbdürrəhim bəy Haqverdiyev, rejissoru Hüseyn Ərəblinski olub. Məcnun rolunda ölməz sənətkar Hüseynqulu Sarabski, Leyli rolunda isə aşpaz şagirdi Əbdürrəhim Fərəcov çıxış ediblər. İlk tamaşa 1908-ci il yanvarın 12-də (25-də) Bakıda Hacı Zeynalabdin Tağıyevin teatrında oynanılıb.

Dahi Azərbaycan şairi Məhəmməd Füzulinin eyniadlı poeması əsasında hazırlanmış “Leyli və Məcnun” yalnız Azərbaycanın deyil, həm də Şərqin ilk operasıdır. Qoca Şərqin opera tarixi məhz bu gündən başlanıb. İlk operanın uğurlarından ruhlanan Üzeyir bəy bir-birinin ardınca “Şeyx Sənan” (1909), “Rüstəm və Söhrab” (1910), “Şah Abbas və Xurşidbanu”, “Əsli və Kərəm” (1912), “Harun və Leyla” (1915) kimi milli operalar yazıb.

Üzeyir Hacıbəyli yaradıcılığının zirvəsi “Koroğlu” operasıdır. “Koroğlu” təkcə Azərbaycan mədəniyyətində deyil, dünya operalarının sırasında əzəmətlə dayanan parlaq nümunələrdən biridir. “Koroğlu” operası Moskva tamaşaçılarını da məftun edib. Taleyi uğurlu gətirmiş bu nəhəng əsər keçmiş sovet respublikalarının opera və balet teatrlarında dəfələrlə göstərilib.

Üzeyir Hacıbəylinin “Füruzə” adlı yarımçıq qalmış bir operası da olub. Xalq rəvayətləri əsasında hazırlanan bu operanın musiqi parçaları arasında “Füruzə”nin ariyası xüsusilə diqqətəlayiqdir. Bəlkə elə buna görədir ki, opera yarımçıq qalsa da, ariya uzun illər müğənnilər tərəfindən məharətlə ifa edilib.

Şərqdə ilk operetta janrının yaranması da Üzeyir Hacıbəylinin adı ilə bağlıdır. Dahi bəstəkarın ilk musiqili komediyası üç pərdədən ibarət “Ər və arvad”dır. Bu əsər Azərbaycanda musiqili komediyanın ilk nümunəsidir. Əsərin ilk tamaşası 1910-cu ildə olub. Rollarda H.Sarabski (Mərcan bəy), Ə.Ağdamski (Minnət xanım) və başqaları çıxış ediblər.

Müəllifin ikinci musiqili komediyası “O olmasın, bu olsun”dur. Əsərin ilk tamaşası 1911-ci ilin aprelində Bakıda olub. Sonralar musiqili komediya müxtəlif dillərə tərcümə olunaraq səhnələşdirilib.

Ölməz sənətkarın üçüncü və sonuncu musiqili komediyası “Arşın mal alan”dır. Bu operetta 70-ə yaxın xarici dilə tərcümə edilib, 100-dən çox teatrın səhnəsində oynanılıb. “Arşın mal alan” beş dəfə ekranlaşdırılıb, dəfələrlə qrammofon valına yazılıb. Bu musiqili komediya əsasında ilk bədii film 1916-cı ildə çəkilib. Bu, səssiz film olub.

Üzeyir Hacıbəylinin ədəbi irsi də çox zəngin və qiymətlidir. Bütün ömrü boyu Azərbaycan mədəniyyətinə, musiqisinə xidmət edən bu unudulmaz şəxsiyyət 300-dən çox xalq mahnısını nota salıb, marş, kantata, fantaziya, mahnı və romanslar, kamera və xor əsərləri yazıb. Maraqlıdır ki, həm Azərbaycan Xalq Cümhuriyyətinin, həm də sovet Azərbaycanının himnləri dahi sənətkara məxsus olub. Müstəqilliyimizi qazandıqdan sonra xalqımıza azadlıq şərafəti çatdıran ilk himni biz bu gün yenə də məhəbbətlə səsləndiririk.

Üzeyir Hacıbəyli təkcə musiqi bəstələmirdi, həm də xalq musiqisinin nəzəri əsaslarını gələcək nəslə çatdırmaq üçün müxtəlif vəsaitlər hazırlayırdı. 1945-ci ildə nəşr edilmiş “Azərbaycan xalq musiqisinin əsasları” adlı elmi əsəri Üzeyir Hacıbəylinin musiqişünas-alim olaraq mükəmməl fəaliyyətinin yadigarı kimi bu gün də musiqi dərsliyi kimi istifadə edilir. Bütün ömrü boyu Azərbaycan mədəniyyətinə, musiqisinə xidmət edən bu unudulmaz şəxsiyyət 300-dən çox xalq mahnısını nota salaraq, marş, kantata, fantaziya, mahnı və romanslar, kamera və xor əsərləri yazıb, yaradıb. O, Azərbaycan musiqisində köklü dönüş yaratmış əsl dahidir. Bu gün adını çox iftixarla qeyd etdiyimiz Üzeyir Hacıbəyli Azərbaycan musiqi mədəniyyəti tarixində yeni gəlişmə yollarının və milli bəstəkarlıq məktəbinin özülünü qoymaqla yanaşı, Azərbaycan musiqisi tarixində ilk opera, ilk musiqili komediya və bir sıra digər janrlarda ilk nümunələrin yaradıcısı kimi xatırlanır. Onun işıqlı xatirəsi xalqının qəlbində əbədi olaraq daim yaşayacaq.

 

Gəncədə XIII Üzeyir Hacıbəyli adına Beynəlxalq Musiqi Festivalı çərçivəsində tədbir keçirilib

Gəncədə XIII Üzeyir Hacıbəyli adına Beynəlxalq Musiqi Festivalı çərçivəsində tədbir keçirilib

Məlum olduğu kimi, Heydər Əliyev Fondu, Azərbaycan Respublikasının Mədəniyyət Nazirliyi, Azərbaycan Bəstəkarlar İttifaqı və Bakı Musiqi Akademiyasının təşkilatçılığı ilə XIII Üzeyir Hacıbəyli adına Beynəlxalq Musiqi Festivalı keçirilir. Hər il ənənəvi olaraq 18-24 sentyabr tarixləri arasında keçirilən festival çərçivəsində növbəti tədbir Gəncə şəhərində baş tutub.

Tədbirdə Gəncə Şəhər İcra Hakimiyyəti başçısının müavini Adil Tağıyev, Türkiyənin Gəncədəki Baş Konsulu Zeki Öztürk, Gəncə Regional Mədəniyyət İdarəsinin rəisi Vasif Cənnətov, Mədəniyyət Nazirliyinin Musiqi sektorunun müdiri Vüqar Hümbətov, ziyalılar, musiqisevərlər və şəhər ictimaiyyətinin nümayəndələri iştirak ediblər.

Əvvəlcə Azərbaycanın müstəqilliyi, suverenliyi və ərazi bütövlüyü uğrunda canından keçən şəhidlərimizin xatirəsi bir dəqiqəlik sükutla yad edilib.

Gəncə Şəhər İcra Hakimiyyəti başçısının müavini Adil Tağıyev çıxış edərək, tədbir iştirakçılarını şəhər rəhbəri Niyazi Bayramovun adından salamlayıb. O qeyd edib ki, Üzeyir Hacıbəyli Azərbaycanda professional musiqi sənətinin banisi hesab edilir. Musiqişünas-alim, şərqdə ilk operanın müəllifi kimi tanınan Üzeyir Hacıbəylinin göstərdiyi xidmətlər Azərbaycan musiqisinin inkişafında əhəmiyyətli yerə malikdir. Gəncədə təşkil olunan bu konsert proqramının “Nizami Gəncəvi İli”nə təsadüf etməsi isə musiqisevərlərdə ikiqat bayram ovqatı yaradıb.

Tədbirdə çıxış edən Gəncə Regional Mədəniyyət İdarəsinin rəisi Vasif Cənnətov bildirib ki, böyük bəstəkarın doğum gününün musiqi bayramı kimi qeyd edilməsi ənənəsi ulu öndər Heydər Əliyev tərəfindən qoyulub. Belə ki, Ümummilli Liderin 1995-ci ildə - bəstəkarın 110 illik yubileyi münasibətilə imzaladığı Fərmanla hər il sentyabrın 18-i ölkəmizdə Milli Musiqi Günü kimi qeyd olunur. Bu çərçivədə Gəncə şəhərində də silsilə tədbirlər keçirilib.

Azərbaycan Respublikası Mədəniyyət Nazirliyinin Musiqi sektorunun müdiri Vüqar Hümbətov bildirib ki, Üzeyir Hacıbəyli adına XIII Beynəlxalq Musiqi Festivalının ilk konsert proqramı azad Şuşada, dahi bəstəkarın doğulduğu və boya-başa çatdığı doğma şəhərdə təşkil olunub. Gəncədən sonra növbəti təbir isə Ağdamda baş tutacaq.

Bakı Musiqi Akademiyasının sənətşünaslıq üzrə fəlsəfə doktoru, Əməkdar müəllim, musiqişünas Xatirə Həsənzadə Üzeyir Hacıbəyli yaradıcılığına nəzər salaraq, bəstəkarın Azərbaycan musiqisinin inkişafına verdiyi töhvələrdən danışıb. O qeyd edib ki, Üzeyir Hacıbəyli mədəniyyət tariximizdə dahi bəstəkar, peşəkar musiqi sənətimizin və milli operamızın banisi, musiqişünas alim, publisist, dramaturq, pedaqoq və ictimai xadim kimi xüsusi yer tutur. Üzeyir Hacıbəylinin bizə qoyduğu miras heç zaman unudulmayacaq.

Rəsmi hissədən sonra Fikrət Əmirov adına Azərbaycan Dövlət Mahnı və Rəqs Ansablı (bədii rəhbər və dirijor Xalq artisti Ağaverdi Paşayev) konsert proqramı ilə çıxış edib. Konsertdə Əməkdar artist İlkin Əhmədov və Rəvanə Əmiraslanovanın ifasında Üzeyir Hacıbəylinin “Leyli və Məcnun” operasından kompozisiya, xanəndə Kazım Nicat Fəxrinin ifasında dahi bəstəkarın Nizami Gəncəvinin sözlərinə yazdığı “Sənsiz” romansı, Nərgiz Kərimovanın ifasında Üzeyir Hacıbəylinin “Arşın mal alan” operettasından Gülcöhrənin ariyası və digər əsərlər musiqisevərlərə təqdim olunub.

Birinci vitse-prezident Mehriban Əliyeva Milli Musiqi Günü münasibətilə paylaşım edib - FOTO

Birinci vitse-prezident Mehriban Əliyeva Milli Musiqi Günü münasibətilə paylaşım edib - FOTO

Azərbaycanın Birinci vitse-prezidenti Mehriban Əliyeva 18 Sentyabr Milli Musiqi Günü münasibətilə rəsmi "İnstagram" hesabında paylaşım edib.

YAZTV xəbər verir ki, paylaşımda deyilir:

"18 Sentyabr Milli Musiqi Günüdür. Bu gün doğum günlərini qeyd etdiyimiz görkəmli Azərbaycan bəstəkarları Üzeyir Hacıbəylinin və Müslüm Maqomayevin əziz xatirəsini ehtiramla yad edirəm.
Azərbaycan xalqı milli musiqi mədəniyyətimizin inkişafına və dünyada tanıdılmasına töhfə vermiş görkəmli bəstəkarlar, dirijorlar, ifaçılar nəsli ilə haqlı olaraq fəxr edir. Öz sələflərinin nadir irsinə bağlılığı qoruyub saxlamaqla musiqimizi yeni səslər, ifalar və yanaşmalarla zənginləşdirən bütün musiqiçilərə təşəkkürümü bildirirəm. Sizin hamınıza tükənməz ilham, enerji, yaradıcılıq uğurları və nailiyyətlər arzulayıram!".

Bakı Musiqi Akademiyasının əməkdaşlarına Prezidentin fərdi təqaüdləri verildi

Bakı Musiqi Akademiyasının əməkdaşlarına Prezidentin fərdi təqaüdləri verildi

Prezident İlham Əliyev Üzeyir Hacıbəyli adına Bakı Musiqi Akademiyasının əməkdaşlarına Azərbaycan Respublikası Prezidentinin fərdi təqaüdlərinin verilməsi haqqında Sərəncam verib.

 

YAZTV xəbər verir ki, Sərəncamla “Azərbaycan Respublikası Prezidentinin fərdi təqaüdünün təsis edilməsi haqqında” Azərbaycan Respublikası Prezidentinin 2002-ci il 11 iyun tarixli 715 nömrəli Fərmanına uyğun olaraq qərara alınır:

 

- Üzeyir Hacıbəyli adına Bakı Musiqi Akademiyasının 100 illiyi münasibətilə Azərbaycanda musiqi təhsilinin inkişafında xidmətlərinə görə Akademiyanın aşağıdakı əməkdaşlarına Azərbaycan Respublikası Prezidentinin fərdi təqaüdləri verilsin:

 

Abbaszadə Nəzmiyyə Müzəffər qızı

 

Sinamdzqvarişvili Siala Vaxtanqovna

 

Yaqubova Tahirə Əhəd qızı.

 

- Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

Gəncə şəhər 3 nömrəli Uşaq Musiqi Məktəbinə yeni direktor təyin olunub

Gəncə şəhər 3 nömrəli Uşaq Musiqi Məktəbinə yeni direktor təyin olunub

Gəncə Regional Mədəniyyət İdarəsinin tabeliyində fəaliyyət göstərən Gəncə şəhər 3 nömrəli Uşaq Musiqi Məktəbinə yeni direktor Hüseynova Svetlana Zelmixan qızı təyin olunub.

Hüseynova Svetlana Zelmixan qızı 17 iyul 1965-ci ildə Gəncə şəhərində ziyalı ailəsində anadan olmuş, 1980-ci ildə Q.Hüseynli adına Gəncə Musiqi Texnikumunu fortepiano ixtisası üzrə fərqlənmə diplomu ilə bitirmiş, 1984-cü ildə Azərbaycan Dövlət Konservatoriyasını konsert ifaçılığı, konsertmeyster, müəllim ixtisası üzrə fərqlənmə diplomu ilə bitirmiş, 1989-2021-ci illərdə Q.Hüseynli adına Gəncə Musiqi Texnikumunda müəllim, 2001-2010-cu illərdə uşaq musiqi məktəblərində əvəzçi müəllim işləmişdir. Musiqi Texnikumunda işlədiyi müddətdə fortepiano şöbəsinin, konsertmeyster ifaçılığı şöbələrinin Fənn Birləşməsi Komitəsinin sədri vəzifəsində işləmişdir. Müəllimliklə bərabər həvəskar bəstəkar kimi də fəaliyyət göstərir.

Şuşada Beynəlxalq Musiqi Festivalının açılışı oldu - Foto

Şuşada Beynəlxalq Musiqi Festivalının açılışı oldu - Foto

Bu gün Şuşa şəhərində Üzeyir Hacıbəyli Beynəlxalq Musiqi Festivalının açılışı olub.   

YAZTV” xəbər verir ki, Üzeyir Hacıbəylinin ad günündə keçirilən festival dahi bəstəkarın heykəlinin ucaldığı parkda baş tutub. Festivalda mədəniyyət və incəsənət xadimləri, tanınmış şuşalılar iştirak edirlər. 

 

Qeyd edək ki, 18-24 sentyabr tarixlərini əhatə edəcək sayca XIII olan bu festival çərçivəsində Bakı, Gəncə, Ağdamda bir neçə tədbirin təşkili planlaşdırılıb. Festivaldə Azərbaycanın bədii kollektivləri, solistləri ilə yanaşı, ABŞ və Polşadan dəvət olunmuş məşhur musiqiçilərin də çıxışı nəzərdə tutulub.

 

 
Bakı Musiqi Akademiyasının əməkdaşlarına fəxri adlar verilib

Bakı Musiqi Akademiyasının əməkdaşlarına fəxri adlar verilib

Prezident İlham Əliyev Üzeyir Hacıbəyli adına Bakı Musiqi Akademiyasının əməkdaşlarına fəxri adların verilməsi haqqında Sərəncam verib.

YAZTV xəbər verir ki, Sərəncamla qərara alınır:

Üzeyir Hacıbəyli adına Bakı Musiqi Akademiyasının 100 illiyi münasibətilə Azərbaycanda musiqi təhsilinin inkişafında xidmətlərinə görə Akademiyanın aşağıdakı əməkdaşlarına Azərbaycan Respublikasının fəxri adları verilsin:

“Əməkdar incəsənət xadimi”

Babayeva Rasimə Əhməd qızı

Neymanova Kəmalə İlyas qızı

“Əməkdar artist”

Ağayeva Rəna Knyazevna

 

Məlikova Nigar Akif qızı

 

“Əməkdar müəllim”

 

Aşumova Samirə Rauf qızı

Bədirxanov Tofiq Nurəli oğlu

Cəfərova Lalə Tahir qızı

Əhədzadə Məleykə Böyükağa qızı

 

Hacıyeva Firəngiz Alim qızı

 

Həsənova Cəmilə İsmayıl qızı

 

Həsənzadə Xatirə Nəriman qızı

 

Mahmudova Gülzar Rafiq qızı

 

Mailova Adilə Hüseynovna

 

Mansurova Nərgiz Nail qızı

 

Məmmədova Arzu Böyükağa qızı

 

Məmmədova Arzu Raiz qızı

 

Məmmədova Leyla Mütalib qızı

 

Məmmədyarova Gülnarə Hadi qızı

 

Mirbabayeva Kəmalə Mir Bağır qızı

 

Nəsirova Könül Yasif qızı

 

Paşayev Əliheydər Paşa oğlu

 

Rüstəmova Afaq Adil qızı

 

Rzayeva Laləxanım Seyid Nağı qızı

 

Sultanova Fəridə Nurəddin qızı

 

Tuayeva Mədinə Zaurbəyovna

 

Yusifova Lətafət Ağa qızı

 

Zamanova Alya Abas qızı.

Azərbaycanın “Avroviziya-2022”də iştirakı təsdiqləndi

Azərbaycanın “Avroviziya-2022”də iştirakı təsdiqləndi

Gələn il İtaliyada keçiriləcək “Avroviziya-2022” mahnı müsabiqəsində ölkəmizin iştirakı təsdiqlənib.

İctimai Televiziya və Radio Yayımları Şirkətindən  verilən məlumata görə, gələn ilin mayında baş tutacaq bu müsabiqədə ölkəmizi kimin təmsil edəcəyi hələlik müəyyən edilməyib.

Müsabiqənin İtaliyanın hansı şəhərində baş tutacağı da məlum deyil. Hazırda bunun üçün namizəd şəhərlər var, lakin yekun qərar verilməyib.

 

Qeyd edək ki, dünyanın ən baxımlı və populyar mahnı müsabiqəsi olan “Avroviziya”nın Azərbaycanda rəsmi yayım hüququ İctimai Televiziya və Radio Yayımları Şirkətinə məxsusdur.

“Avroviziya-2022” mahnı müsabiqəsinin Azərbaycan üzrə nümayəndə heyətinin rəhbəri tanınmış bəstəkar və prodüser İsa Məlikovdur.

Los-Ancelesdə Üzeyir Hacıbəyliyə həsr olunan qısa film hazırlanıb

Los-Ancelesdə Üzeyir Hacıbəyliyə həsr olunan qısa film hazırlanıb

Azərbaycanın Los-Ancelesdəki Baş Konsulluğu Üzeyir Hacıbəylinin 18 sentyabr doğum günü münasibətilə dahi bəstəkara həsr olunmuş ingilis dilində qısa film hazırlayıb.

Konsulluqdan verilən məlumata görə, filmdə Ü.Hacıbəylinin 1885-ci ildə Qarabağda anadan olduğu və Azərbaycan musiqisinin beşiyi olan Şuşa şəhərində boya-başa çatdığı qeyd olunur.

Onun məhz Şuşada muğam musiqisini öyəndiyi və gələcək bəstələrində bundan istifadə etdiyi vurğulanır. 1908-ci ildə o zaman 23 yaşı olan Ü.Hacıbəylinin müsəlman dünyasında ilk opera olan “Leyli və Məcnun” operasının Bakıda səhnəyə qoyulduğu diqqətə çatdırılır.

Ü.Hacıbəylinin 1913-cü ildə ilk dəfə səhnələşdirilən “Arşın mal alan” operettasının qadın hüquq və azadlıqlarını ön plana çəkərək təbliğ etdiyi və digər ölkələrdə də geniş rəğbət qazandığı bildirilir.

Həmçinin Azərbaycan Demokratik Respublikasının 1918-20-ci illərdəki qısamüddətli fəaliyyəti dövründə Ü.Hacıbəylinin Azərbaycanın müstəqilliyinin ən böyük tərəfdarlarından olduğu vurğulanır. Onun müstəqil Azərbaycanın Dövlət Himnini bəstələdiyi qeyd olunur. Filmdə Ü.Hacıbəylinin 1920-ci ildə Azərbaycan Dövlət Konservatoriyasının əsasını qoyduğu və ölkəmizin ən görkəmli bəstəkarlarını yetişdirdiyi bildirilir. Bu səpkidə həmin dövrə aid nadir şəkillər rəngli formatda nümayiş etdirilir.

1945-ci ildə “Arşın mal alan” operettasının əsasında ilk filmin hazırlandığı, daha sonra bu filmin 86 dilə tərcümə olunaraq 136 ölkədə nümayiş etdirildiyi diqqətə çatdırılır. Heydər Əliyev Fondu tərəfindən rəngli formatda bərpa edilən “Arşın mal alan” filminin 2015-ci ildə Hollivudda premyerasının keçirildiyi, “Arşın mal alan” operettasının isə ABŞ-da tarixdə ən böyük nümayişinin 2013-cü ildə Los-Ancelesdə baş tutduğu qeyd olunur. 2015-ci ildə Los-Anceles merinin 18 sentyabr tarixini bu şəhərdə Ü.Hacıbəylinin anım günü kimi elan etməsi əks olunur və bununla bağlı imzalanmış bəyannamə nümayiş etdirilir. 2013-cü ildə Google şirkəti tərəfindən Ü.Hacıbəylinin doğum gününün qeyd olunduğu vurğulanır.

Filmdə Ermənistan silahlı qüvvələrinin 1992-ci ildə Şuşanı işğal etdiyi, Ü.Hacıbəylinin ev muzeyini və abidələrini talan edərək dağıtdığı bildirilir. 2020-ci ildə Azərbaycanın Şuşanı işğaldan azad etdiyi, Ü.Hacıbəylinin abidələrini şəhərə geri qaytardığı və hazırda onun ev muzeyinin bərpa olunduğu diqqətə çatdırılır. Sonda Ü.Hacıbəylinin möhtəşəm irsinin Azərbaycanda və ölkəmizin hüdudları xaricində daim yaşadığı vurğulanır.

Qeyd edək ki, sosial şəbəkələrin inkişafı nəzərə alınaraq effektiv təbliğat işində son illərdə qısa filmlərin önəmi olduqca artıb. Bunu nəzərə alaraq, 2019-cu ildən başlayaraq, Los-Ancelesdəki Baş Konsulluğumuz Azərbaycana dair müxtəlif mövzularda 27 film hazırlayaraq geniş şəkildə yayıb. Filmlərin bir çoxu dünyanın digər aparıcı dillərinə də tərcümə olunub.

https://www.youtube.com/watch?v=Sus4xeKfk-8 

Prezident İlham Əliyev Bakı Musiqi Akademiyasının bir qrup əməkdaşını təltif etdi

Prezident İlham Əliyev Bakı Musiqi Akademiyasının bir qrup əməkdaşını təltif etdi

Prezident İlham Əliyev Üzeyir Hacıbəyli adına Bakı Musiqi Akademiyasının əməkdaşlarının təltif edilməsi haqqında Sərəncam imzalayıb.

YAZTVxəbər verir ki, Sərəncamla qərara alınır:

Üzeyir Hacıbəyli adına Bakı Musiqi Akademiyasının 100 illiyi münasibətilə Azərbaycanda musiqi təhsilinin inkişafında xidmətlərinə görə Akademiyanın aşağıdakı əməkdaşları təltif edilsinlər:

3-cü dərəcəli “Əmək” ordeni ilə

 

Acalova Gülnarə Almazovna

 

Əfəndiyeva İmruz Məmməd Sadıx qızı

 

Əzimov Aydın Kərim oğlu

 

İmanova Ülviyyə İsmayıl qızı

 

Quliyeva Nərminə Əhməd qızı

 

Məmmədov Tariyel Aydın oğlu

 

Seyidov Tərlan Mir Əşrəf oğlu

 

“Tərəqqi” medalı ilə

 

Axundova Könül Tofiq qızı

 

Axundova Yeganə Əsgər qızı

 

Ələsgərov Arzu Süleyman oğlu

 

Əsədova Səbinə Çingizovna

 

Fərəcov Tahir Heydər oğlu

 

Həsənov Hidayyət Həsən oğlu

 

Hüseynova Könül Qabil qızı

 

İsmayılzadə Nuridə Cəfər qızı

 

Quliyev Tərlan Aslan oğlu

 

Məmmədova Sevda Binyatulla qızı

 

Məmmədova Sevda Əhməd qızı

 

Musayeva Elmira Danil qızı

 

Rəhimova Aytac Elxan qızı

 

Rimazi Nəzakət Hüseyn qızı

 

Süleymanova Tomrid Kazım qızı.