Monday, 23 May 2022 10:21
Yeni Azərbaycan Televiziyası
Bakı
İstanbul
Moskva
ABŞ İranı nüvə sazişi ilə bağlı yekun qərar verməyə çağırıb

ABŞ İranı nüvə sazişi ilə bağlı yekun qərar verməyə çağırıb

ABŞ İranı nüvə sazişinin bərpası ilə bağlı qərara verməyə çağırıb.

YAZTV xarici KİV-ə istinadən xəbər verir ki, bunu ABŞ Dövlət Departamentinin yüksək rütbəli rəsmisi deyib.

Rəsmi hesab edir ki, bu məsələ ilə bağlı razılaşma hələ də təmin edilməyib.

"İran razılaşmadan kənar şərtlərdə israr edib-etməyəcəyinə və tezliklə razılaşmaya nail olmaq barədə qərar verməlidir. ABŞ və onun tərəfdaşları buna çoxdan hazırdır. İndi iş İrandan asılıdır", - diplomat qeyd edib.

2015-ci ildə Böyük Britaniya, Almaniya, Çin, Rusiya, ABŞ, Fransa və İran nüvə proqramını məhdudlaşdırmaq müqabilində sanksiyaların ləğvini nəzərdə tutan Birgə Hərtərəfli Fəaliyyət Planı (JCPOA) imzalayıblar.

2018-ci ilin mayında ABŞ İrana qarşı sanksiyaları bərpa edib. Buna cavab olaraq İran nüvə tədqiqatları, sentrifuqalar və uranın zənginləşdirilməsi səviyyəsinə qoyulan məhdudiyyətlərdən imtina edərək, saziş üzrə öhdəliklərinin mərhələli şəkildə azaldılmasını elan edib.

Hazırda İrana qarşı sanksiyaların ləğvi üçün Vyanada danışıqlar davam edir.

Nigeriyada yol qəzasında 13 nəfər ölüb

Nigeriyada yol qəzasında 13 nəfər ölüb

Nigeriyanın şimal-qərbində baş vermiş yol qəzasında 13 nəfər həlak olub.

YAZTV-nin məlumatına görə, Ciqava ştatında sərnişin aparan yük maşını qəzaya uğrayıb.

Hadisə nəticəsində həmçinin 32 nəfər xəsarət alıb. 

Qeyd olunur ki, qəza sürücünün idarəetməni itirməsi nəticəsində baş verib. Hadisə ilə bağlı araşdırma aparılır.

BMT: Ukraynada 1 276 dinc sakin həlak olub

BMT: Ukraynada 1 276 dinc sakin həlak olub

Rusiya Federasiyasının tammiqyaslı hücumundan sonra Ukraynada dinc əhali arasında mülki əhali arasında qurbanların sayı azı 3 257 nəfərə çatıb. Onlardan 115-i uşaq olmaqla 1 276 nəfər həlak olub.

YAZTV xəbər verir ki, bu məlumatlar Birləşmiş Millətlər Təşkilatı tərəfindən qeydə alınıb.

Qeyd edilir ki, ölən 1 276 nəfərdən 260-ı kişi, 184-ü qadın, 18-i qız və 36-ı oğlandır.

BMT-nin məlumatına görə, qeydə alınmış mülki ölüm və ya xəsarətlərin əksəriyyətinə ağır artilleriyadan və çoxsaylı raket sistemlərindən atılan atəşlər, həmçinin raket və hava zərbələri də daxil olmaqla geniş təsir sahəsinə malik partlayıcı qurğuların istifadəsi səbəb olub.

BMT-nin İnsan Hüquqları üzrə Ali Komissarlığı real rəqəmlərin daha çox olduğunu vurğulayıb.

Ukraynalı rejissor Kiyev yaxınlığında ölü tapıldı

Ukraynalı rejissor Kiyev yaxınlığında ölü tapıldı

Ukraynalı sənədli film rejissoru və fotojurnalist Maks Levin Kiyev yaxınlığında ölü tapılıb.

YAZTV” xəbər verir ki, Ukrayna Prezidenti Aparatının rəhbəri Andrey Yermak özünün Teleqram kanalında Levinin cəsədinin dünən Quta Mejigirska kəndi yaxınlığında tapıldığını bildirib.

Yermak qeyd edib ki, Levin martın 13-də Kiyevdəki münaqişə zonasında yoxa çıxıb.

Ukrayna daxili işlər nazirinin müşaviri Anton Qeraşenko Telegram vasitəsilə təsdiqləyib ki, ukraynalı sənədli film rejissoru iki həftə əvvəl gərgin döyüşlərin getdiyi Vişqorod vilayətində yoxa çıxıb.

Levinin 10 ilə yaxın işlədiyi “LB.ua” media qurumu sənədli film rejissorunun “Rusiya təcavüzünün nəticələrini sənədləşdirmək üçün” martın 13-də əsgər və keçmiş fotoqraf Oleksiy Çernışo ilə Quta Mejigirskaya getdiyini bildirib.

Mətbuat ikilinin maşınlarını qoyub Moşçun kəndinə yollandığını və həmin gündən onlardan xəbər alınmadığını, Aleksey Çernışovun taleyinin isə hələlik naməlum olduğunu qeyd edib.

Ukraynanın Kütləvi İnformasiya İnstitutu qeyri-hökumət təşkilatı prokurorluğun istintaqla bağlı ilkin hesabatına istinad edərək, “silahsız” Levinin “rus qoşunlarına məxsus güllələrdən” öldürüldüyünü açıqlayıb.

Ukrayna Baş Qərargahı Rusiyanın itkilərinin sayını açıqlayıb

Ukrayna Baş Qərargahı Rusiyanın itkilərinin sayını açıqlayıb

Rusiya Silahlı Qüvvələrinin Ukraynada itirdiyi qüvvələrin yeni sayı məlum olub.

YAZTV xəbər verir ki, bu barədə Ukrayna Silahlı Qüvvələrinin Baş Qərargahı feysbuk səhifəsində məlumat yayıb.

Bildirilib ki, indiyədək 17 800 hərbçi zərərsizləşdirilib.

Bundan başqa, hücum edən tərəfin 631 ədəd tankı, 1 776 ədəd zirehli döyüş maşını, 316 ədəd artilleriya sistemi, 100 ədəd RYAS (reaktiv yaylım atəş sistemi), 54 hava hücumundan müdafiə sistemi, 143 ədəd hərbi təyyarəsi, 134 ədəd helikopteri, 1236 ədəd nəqliyyat vasitəsi, 7 ədəd gəmi/kater, 76 ədəd yanacaq çəni, 87 ədəd dronu, 24 ədəd xüsusi texnikası və 4 operativ-taktiki raket komplesi məhv edilib.

Xatırladaq ki, Rusiya 2014-cü ilin fevralında Ukraynanın Krım Muxtar Respublikasını ilhaq edib. Bundan sonra Ukraynanın Donbas bölgəsində hərbi əməliyyatlara başlayıb. Nəticədə Donetsk və Luqansk vilayətlərinin böyük hissəsi separatçıların nəzarətinə keçib. Döyüşlər Ukraynanın Silahlı Qüvvələri və Rusiyanın dəstəklədiyi qondarma Donetsk və Luqansk respublikalarının silahlıları arasında gedib. Rəsmi Moskva döyüşlərdə iştirakının olması ittihamını rədd edib.

Daha sonra 2020-ci ilin sonundan başlayaraq Ukrayna və Rusiya arasında münasibətlər daha da gərginləşməyə başlayıb, Donbasda təmas xəttində atəşkəsin pozulması mütəmadi xarakter alıb. ABŞ başda olmaqla Ukraynanın müttəfiqləri hərbi və maliyyə cəhətdən rəsmi Kiyevə yardım etsə də, münaqişəyə birbaşa müdaxilə etməyəcəklərini vurğulayıblar.

2022-ci ilin fevralın 21-də Rusiya Prezidenti Vladimir Putin xalqa müraciətində Ukraynanın Donbas ərazisində yaradılan iki qondarma respublikanı tanıdığını bildirib. O, bununla bağlı fərman imzalayıb.

2022-ci ilin fevralın 24-də Rusiya Silahlı Qüvvələri Ukraynanın “denasifikasiya və demilitarizasiyası” (nasizm ünsürlərindən təmizlənmə və silahsızlaşdırılma), habelə Donetsk və Luqansk “respublikalarının ərazi bütövlüyünün” təmin olunması məqsədilə ölkəyə şərq, cənub (Krım) və şimal (Belarus) istiqamətlərdən hücuma başlayıb. Rusiyada “xüsusi hərbi əməliyyat” adlanan bu müharibədə indiyədək Ukraynanın bir sıra şəhərləri, o cümlədən Xerson, Melitopol şəhərləri işğal edilib. Minlərlə dinc sakin həlak olub, milyonlarla insan yurdlarından didərgin salınıb. Müharibənin ilk günlərindən Qərb Rusiyaya qarşı ən sərt iqtisadi sanksiyaları işə salıb. Nəticədə ölkənin milli valyutası rubl çöküş yaşayır. Bu sanksiyalar ilk dəfə olaraq humanitar sahələrə də toxunub.

Bundan başqa, Beynəlxalq Cinayət Məhkəməsində (Haaqa) Rusiyanın Ukraynaya qarşı təcavüzü ilə əlaqədar insanlığa qarşı cinayətlərin araşdırılmasına başlayıb.

Qeyd edək ki, Azərbaycan daxil olmaqla, BMT üzvlərinin mütləq əksəriyyəti Krım yarımadası və Donbası Ukraynanın ərazisi olaraq tanıyır.

ABŞ Prezidenti dünya müsəlmanlarını təbrik edib

ABŞ Prezidenti dünya müsəlmanlarını təbrik edib

ABŞ Prezidenti Cozef Bayden dünya müsəlmanlarını Ramazan ayının başlanması münasibətilə təbrik edib.

Bu barədə YAZTV dövlət başçısının tviter hesabına istinadən xəbər verir.

“Jil və mən Ramazan ayının əvvəli ilə əlaqədar Birləşmiş Ştatlarda və bütün dünyada yaşayan müsəlman icmalarına ən xoş arzularımızı çatdırırıq. Xalq Evindən öz evlərinizə, Sizə və yaxınlarınıza bərəkətli və tərəqqili bir ay arzulayırıq. Ramazan ayınız mübarək!”, - dövlət başçısı sosial şəbəkə hesabında yazıb.

Ukraynanın Nikolayev şəhərinə endirilən raket zərbəsi nəticəsində 36 nəfər ölüb

Ukraynanın Nikolayev şəhərinə endirilən raket zərbəsi nəticəsində 36 nəfər ölüb

Ukraynanın Nikolayev şəhərində vilayət dövlət administrasiyasının binasına endirilən raket zərbəsi nəticəsində ölənlərin sayı 36-ya çatıb.

YAZTV Ukrayna KİV-ə istinadən xəbər verir ki, bu barədə Nikolayev vilayəti hərbi administrasiyasının rəhbəri Vitali Kim bildirib.

Ölənlər arasında hərbi administrasiyası rəhbərinin köməkçisi də var. Onun meyiti dağıntılar altından bu gün çıxarılıb.

Vitali Kim deyib ki, Nikolayev vilayətində yerli sakinlərə zədələnmiş hərbi texnikaların hissələrini götürüb metal tullantılarının qəbul mərkəzlərinə təhvil vermək qadağan olunacaq. O, Ukrayna ordusunun ehtiyacları üçün istifadə ediləcək.

Bundan əlavə, Kim Nikolayev vilayətinin ərazisində yerləşən Rusiya qüvvələrinə müqavimət göstərmək üçün xüsusi qruplar yaradıldığını deyib

Ukrayna hərbçiləri daha bir yaşayış məntəqəsini azad edib

Ukrayna hərbçiləri daha bir yaşayış məntəqəsini azad edib

Ukrayna ordusunun bölmələri Kiyev əyalətinin Borodyanka qəsəbəsini Rusiya hərbçilərindən azad edib.

Bu barədə YAZTV “ArmyInform”a istinadən xəbər verir.

Hələlik hərbi əməliyyatın təfərrüatları açıqlanmır.

Bununla bağlı yayılan görüntülərdə yerli müdafiəçilərin Rusiya hərbçiləri tərəfindən yandırılan Borodyankadakı polis idarəsi fonunda Ukrayna bayrağı ilə yer alıblar.

Ukrayna və Rusiya arasında növbəti əsir mübadiləsi olub

Ukrayna və Rusiya arasında növbəti əsir mübadiləsi olub

Aprelin 1-də Ukraynanın Zaporojye vilayətində Rusiya ilə əsirlərin mübadiləsi aparılıb.

YAZTV UNİAN-a istinadən xəbər verir ki, bu barədə Ukrayna Prezidenti Ofisinin rəhbər müavini Kirilo Timoşenko bildirib.

Onun sözlərinə görə, 15-i qadın olmaqla, 86 Ukrayna hərbçisi əsirlikdən azad edilib. Timoşenko həmçinin qeyd edib ki, azad edilmiş hərbçilər artıq təhlükəsiz yerdədirlər və hazırda onların həyatına heç bir təhlükə yoxdur.

Əsirlərin dəyişdirilməsinin təfərrüatı açıqlanmır.

Roma Papası Kiyevə səfərə hazırlaşır

Roma Papası Kiyevə səfərə hazırlaşır

Roma Papası Fransisk Ukraynanın paytaxtı Kiyevə səfər edə bilər.

YAZTV “TASS”a istinadən xəbər verir ki, bu barədə məlumatı Amerikanın “NBC NEWS” telekanalının jurnalisti Klaudio Lavanqa açıqlayıb.

Onun sözlərinə görə, Maltaya səfər edərkən yolda Roma Papasından Kiyevə səfər etməyi nəzərdən keçirib-keçirmədiyini soruşub. Roma Papası isə cavabında Kiyevə səfərlə bağlı belə bir təklifin hazırda müzakirə edildiyini qeyd edib. 

Qeyd edək ki, daha əvvəl yayılan məlumatda Roma Papasının son həftələrdə Ukrayna paytaxtına səfər etməsi ilə bağlı bir neçə dəvət məktubu aldığı qeyd olunub. Dəvət məktubu göndərən şəxslərdən biri də Kiyevin meri Vitali Kliçko olub.

Türkiyədə ötən sutka koronavirusa 13 mindən çox yoluxma halı qeydə alınıb

Türkiyədə ötən sutka koronavirusa 13 mindən çox yoluxma halı qeydə alınıb

Türkiyədə son sutka ərzində yeni növ koronavirusdan (COVİD-19) 45 nəfər vəfat edib.

YAZTV-nin məlumatına görə, bu barədə Türkiyənin Səhiyyə Nazirliyindən bildiriblər.

Məlumata əsasən, ölkədə koronavirus infeksiyasının müəyyən edilməsi ilə əlaqədar 265 362 nəfər test edilib, 13 367 yeni yoluxma halı qeydə alınıb. 

Qeyd edilib ki, ötən gün koronavirusdan 14 858 nəfər sağalıb.

Putin Paşinyanla Qarabağda sabitliyin qorunması məsələsini müzakirə edib

Putin Paşinyanla Qarabağda sabitliyin qorunması məsələsini müzakirə edib

Rusiya Prezidenti Vladimir Putin Ermənistanın baş naziri Nikol Paşinyan ilə telefon danışığı aparıb.

YAZTV TASS-a istinadən xəbər verir ki, bu barədə Kremlin mətbuat xidməti məlumat yayıb.

“Rusiya Federasiyasının Prezidenti Vladimir Putin ilə Ermənistan Respublikasının baş naziri Nikol Paşinyan arasında telefon danışığı baş tutub. Qarabağda sabitliyin qorunması ilə bağlı fikir mübadiləsi davam etdirilib. Azərbaycan, Ermənistan və Rusiya liderlərinin 9/10 noyabr 2020-ci il, 11 yanvar və 26 noyabr 2021-ci il tarixlərində əldə edilmiş üçtərəfli razılaşmalarına ciddi əməl olunmasının zəruriliyi təsdiqlənib”, - məlumatda deyilir.